គ្រូបង្រៀនសាសនាជាតិអ៊ីស្រាអែល និងសាច់ញាតិនៃអ្នកដែលជឿថា ត្រូវបានចាប់ពង្រត់ និងឃុំខ្លួនដោយក្រុមសកម្មប្រយុទ្ធហាម៉ាស នៅតំបន់ហ្គាហ្សាស្ទ្រីប បានប្រមូលផ្តុំគ្នាក្នុងទីក្រុងហ្ស៊េរុយសាឡិម កាលពីថ្ងៃពុធ (ទី២៥ ខែតុលា) ដើម្បីបួងសួងបន់ស្រន់ឲ្យមានការដោះលែងចំណាប់ថ្នូរទាំងនោះ។

ព្រឹត្តិការណ៍ ដែលត្រូវបានគេឲ្យឈ្មោះថា «ទិវាពិភពលោកនៃការអធិដ្ឋាន និងសាមគ្គីគ្នា» ត្រូវបានរៀបចំឡើងដោយសាលាសាសនាជ្វីហ្វ និងស្ថាប័ន Aish នៅលើដំបូលនៃទីក្រុងចំណាស់ ដែលអាចមើលឃើញទីលាន Western Wall Plaza។

យោងតាមស្ថាប័ន Aish បានឲ្យដឹងថា ពិធីនេះត្រូវបានផ្សាយបន្តផ្ទាល់ដោយប្រព័ន្ធផ្សព្វផ្សាយ ជាមួយនឹងប្រធានបទ «យើងរួបរួមគ្នា ក្នុងការបង្ហាញពីសាមគ្គីភាព និងការគាំទ្រ ដើម្បីអធិដ្ឋានសម្រាប់សុខុមាលភាពនៃអ្នកដែលត្រូវបានចាប់ពង្រត់ និងបាត់ខ្លួន ហើយអំពាវនាវឲ្យមានការដោះលែងជាបន្ទាន់»។ វាគ្មិនរួមមានលោកស្រី Meirav Gonen ដែលកូនស្រីរបស់គាត់ឈ្មោះ Romi ត្រូវបានគេជឿថា ស្ថិតក្នុងចំណោមមនុស្សជាង ២០០នាក់ ដែលពួកសកម្មប្រយុទ្ធប៉ាឡេស្ទីន នាំខ្លួនយកទៅតំបន់ហ្គាហ្សា។

ក្រុមសកម្មប្រយុទ្ធហាម៉ាស បានសម្រុកចេញពីតំបន់ឆ្នេរប៉ាឡេស្ទីន ដែលត្រូវបានហ៊ុមព័ទ្ធ កាលពីថ្ងៃទី៧ ខែតុលា ដោយបានដើរបាញ់រះតាមសហគមន៍នានារបសអ៊ីស្រាអែល ដោយធ្វើការចាប់ខ្លួន និងសម្លាប់មនុស្ស ១.៤០០នាក់។ ជាការឆ្លើយតប អ៊ីស្រាអែលបានវាយប្រហារតាមអាកាស។ ក្រសួងសុខាភិបាលនៅតំបន់ ហ្គាហ្សាដែលគ្រប់គ្រងដោយក្រុមហាម៉ាស បាននិយាយកាលពីថ្ងៃពុធ (ទី២៥ ខែតុលា) ថា ចំនួនអ្នកស្លាប់ប៉ាឡេស្ទីនឥឡូវនេះ ឡើងលើសពី ៦.៥០០នាក់ហើយ៕