កងទ័ពជើងទឹកកូរ៉េខាងត្បូង នៅថ្ងៃព្រហស្បតិ៍ (ទី២៦ ខែតុលា) នេះ បានឲ្យដឹងថា ប្រទេសកូរ៉េខាងត្បូង និងសហរដ្ឋអាមេរិក បាននិងកំពុងធ្វើសមយុទ្ធដែនសមុទ្រទ្រង់ទ្រាយធំ នៅសមុទ្រលឿង ដើម្បីពង្រឹងជំហរការពារ និងអន្តរប្រតិបត្តិការរបស់សម្ព័ន្ធមិត្ត។

ដោយជាផ្នែកនៃលំហាត់សមប្រចាំឆ្នាំ នៅទីលាន Hoguk សមយុទ្ធនេះ ដែលមានការចូលរួមពីកងទ័ពជើងទឹក កងទ័ពអាកាស កងយោធា និងឆ្មាំល្បាតសមុទ្ររបស់ប្រទេសកូរ៉េខាងត្បូង ក៏ដូចជាកងទ័ពជើងទឹក និងកងយោធាសហរដ្ឋអាមេរិក បានចាប់ផ្ដើម កាលពីថ្ងៃអង្គារដើមសប្ដាហ៍នេះ សម្រាប់រយៈពេល ៤ថ្ងៃ នៅក្នុងដែនទឹកភាគខាងលិចទីក្រុង Taean ចម្ងាយប្រហែល ១១០គីឡូម៉ែត្រ ភាគនិរតីទីក្រុងសេអ៊ូល។

នាវាចម្បាំងប្រហែល ៣០គ្រឿង ក្នុងនោះរួមទាំងនាវាពិឃាតបំពាក់ប្រព័ន្ធប្រយុទ្ធ Aegis យន្តហោះស៊ើបការណ៍ដែនសមុទ្រ និងឧទ្ធម្ភាគចក្រ ត្រូវបានដាក់ពង្រាយ ដើម្បីធ្វើសមយុទ្ធរួមជាមួយនឹងអង្គភាពឆ្មាំល្បាតឆ្នេរសមុទ្ររបស់កងទ័ព យន្តហោះចម្បាំងរបស់កងទ័ពអាកាស និងនាវាឆ្មាំល្បាតឆ្នេរសមុទ្រ។ យន្តហោះល្បាតដែនសមុទ្រ P-8 របស់កងទ័ពជើងទឹកអាមេរិក និងឧទ្ធម្ភាគចក្រ Apache របស់កងយោធា បានចូលរួមសមយុទ្ធនេះ។

យោងតាមកងទ័ពជើងទឹកកូរ៉េខាងត្បូងដដែល បានឲ្យដឹងបន្ថែមថា កងកម្លាំងកូរ៉េខាងត្បូង និងសហរដ្ឋអាមេរិក បានធ្វើប្រតិបត្តិការការពារប្រឆាំងនឹងការបង្កហេតុរបស់កូរ៉េខាងជើង នៅជិតព្រំដែនសមុទ្រអន្តរកូរ៉េ ដើម្បីបង្កើនសមត្ថភាពប្រតិបត្តិការរួមគ្នា និងចម្រុះរបស់ប្រទេសទាំង២៕