ឥណ្ឌា៖ ប្រទេសឥណ្ឌាបានរាយការណ៍ថា មានការឆ្លងវីរុស COVID-19 ថ្មីចំនួន ១១៤,៤៦០ករណីកាលពីថ្ងៃអាទិត្យ ដែលជាកម្រិតទាបបំផុតក្នុងរយៈពេលពីរខែមកនេះ ខណៈចំនួនអ្នកស្លាប់បានកើនឡើងដល់ ២.៦៧៧នាក់ ហើយផ្នែកខ្លះនៃប្រទេសបានត្រៀមបន្ធូរបន្ថយការរឹតត្បិតការធ្វើដំណើរ។
យោងតាមទិន្នន័យរបស់ក្រសួងសុខាភិបាលបានឲ្យដឹងថា ប្រទេសឥណ្ឌាមានចំនួនអ្នកឆ្លងវីរុសកូរ៉ូណាច្រើនលំដាប់ទី២ នៅលើពិភពលោកបន្ទាប់ពីសហរដ្ឋអាមេរិកដែលមានករណីសរុបចំនួន ២៨,៨លាននាក់ និងមានអ្នកស្លាប់ចំនួន ៣៤៦.៧៥៩នាក់។ រលកទី២ នៃមេរោគឆ្លងកូរ៉ូណាបណ្ដាលឱ្យមានការប៉ះពាល់យ៉ាងខ្លាំង ដល់អ្នករស់នៅតាមជនបទនៃប្រទេស ដែលមិនទាន់ថយចុះនៅឡើយ ប៉ុន្តែទីក្រុងញូវដេលី និងទីក្រុងដទៃទៀតកំពុងធ្វើការ ឆ្ពោះទៅរកការអនុញ្ញាតឱ្យអាជីវកម្មបន្ថែមទៀតធ្វើប្រតិបត្តិការ និងវិធាការធ្វើដំណើរត្រូវបានបន្ធូរបន្ថយចាប់ពីថ្ងៃចន្ទនេះតទៅ។ រដ្ឋ Maharashtra ភាគខាងលិចដែលជារដ្ឋមានជាងគេនៅឥណ្ឌា និងទទួលរងការឆ្លងច្រើនបំផុតក្នុងអំឡុងរលកទី២ គ្រោងនឹងចាប់ផ្ដើមនៅសប្ដាហ៍នេះ ដើម្បីបន្ធូរបន្ថយជាដំណាក់កាលនូវការបិទក្រុងយ៉ាងតឹងរ៉ឹង ដែលត្រូវបានដាក់កាលពីខែមេសា។
ក្រុមអ្នកវិទ្យាសាស្ត្របានព្រមានពីរលកទី៣ នៃមេរោគឆ្លងកូរ៉ូណា ដែលអាចវាយលុកប្រទេសឥណ្ឌានៅឆ្នាំក្រោយ ដែលទំនងជាប៉ះពាល់ដល់កុមារជាច្រើន។ ខណៈដែលប្រទេសនេះបានបង្កើនការជំរុញការចាក់វ៉ាក់សាំង ក្នុងរយៈពេលប៉ុន្មានសប្ដាហ៍ចុងក្រោយនេះ បន្ទាប់ពីការចាប់ផ្ដើមយឺត ប្រជាជនភាគច្រើនត្រូវបានគេរំពឹងថា នឹងនៅតែមិនអាចទទួលបានវ៉ាក់សាំងទាន់ពេលក្នុងរលកទី៣ ដ៏មានសក្ដានុពល៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
