ភ្នំពេញ ៖ ខណៈកម្មវិធីបណ្តុះបណ្តាលបច្ចេកទេសវិជ្ជាជីវៈសម្រាប់យុវជន ១,៥លាននាក់ គ្រោងនឹងដាក់ឲ្យដំណើរការឆាប់ៗខាងមុខនេះ។ ក្រសួងការងារ និងបណ្តុះបណ្តាលវិជ្ជាជីវៈ បានបើកវគ្គវិក្រិតការគ្រូបច្ចេកទេសមកពីរាជធានី ខេត្តចំនួនសរុប ២៤៨នាក់ ស្តីពីវិធីសាស្រ្តបង្រៀននិងការប្រើប្រាស់ម៉ូឌុលតាមជំនាញ ដែលមានរយៈពេល ១០ថ្ងៃ។

​យោងតាមរបាយការណ៍សង្ខេបរបស់ ឯកឧត្តម ហ៊ីង ស៊ីដេត អគ្គនាយក នៃអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ បានឲ្យដឹងថា វគ្គវិក្រិតការនេះ ប្រព្រឹត្តទៅចាប់ផ្តើមពីថ្ងៃទី២៦ ខែតុលា ដល់ថ្ងៃទី៤ ខែវិច្ឆិកា ឆ្នាំ២០២៣ ក្នុងគោលបំណងដើម្បីពង្រឹងសមត្ថភាពគ្រូបច្ចេកទេស អំពីវិធីសាស្រ្តបង្រៀន និងការប្រើប្រាស់ម៉ូឌុលតាមជំនាញតាមស្តង់ដារមួយ ដែលមានលក្ខណៈទន់ភ្លន់ បត់បែនតាមជំនាញ។ ឯកឧត្តម បានឲ្យដឹងទៀតថា វគ្គវិក្រិតការនេះ មានការចូលរួមពីគ្រូបច្ចេកទេសមកពីគ្រឹះស្ថានអប់រំបណ្តុះបណ្តាលបច្ចេកទេស ក្នុងក្រុមវិស័យលើ ២០ជំនាញ រួមមាន៖ វិស័យសំណង់, វិស័យអគ្គិសនីនិងថាមពល, វិស័យអេឡិចត្រូនិច, វិស័យកម្មន្តសាល, វិស័យមេកានិច, ធុរកិច្ចនិងព័ត៌មានវិទ្យា, វិស័យសេវាកម្ម, វិស័យបរិក្ខាត្រជាក់, វិស័យ ទេសចរណ៍ និងវិស័យកសិកម្ម-កសិឧស្សាហកម្ម។

នៅក្នុងពិធីបើកវគ្គវិក្រិតការគ្រូបច្ចេកទេស នៅព្រឹកថ្ងៃទី២៦ ខែតុលា ឆ្នាំ២០២៣នេះ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានស្នើឲ្យសិក្ខាកាមទាំងអស់ ឲ្យយកចិត្តទុកដាក់ និងប្រឹងប្រែងយ៉ាងណាក្រេបជញ្ជក់ចំណេះដឹងបន្ថែមនេះ ដើម្បីបន្តបណ្តុះបណ្តាលយុវជនប្រកបដោយគុណភាព និងឆ្លើយតបទីផ្សារការងារដែលខ្វះខាត ដើម្បីឆ្លើយតបនឹងតម្រូវការទីផ្សារការងារ ព្រមទាំងជួយលើកកម្ពស់ជីវភាពរបស់យុវជនទាំងនោះឲ្យកាន់តែប្រសើរជាងមុន។ ឯកឧត្តមបានគូសបញ្ជាក់ថា តាមរយៈការបណ្តុះបណ្តាលកម្រិតជាតិនេះ យុវជនមកពីគ្រួសារក្រីក្រ និងងាយរងហានិភ័យ នឹងក្លាយជាកម្មករជំនាញ អ្នកបច្ចេកទេស ព្រមទាំងចូលរួមយ៉ាងសកម្មក្នុងការអភិវឌ្ឍសង្គម និងសេដ្ឋកិច្ចជាតិ។

តាមរយៈកម្មវិធីបណ្តុះបណ្តាលបច្ចេកទេសវិជ្ជាជីវៈសម្រាប់យុវជនមកពីគ្រួសារក្រីក្រ និងគ្រួសាររងហានិភ័យចំនួន ១,៥លាននាក់នេះ។ រាជរដ្ឋាភិបាលកម្ពុជា គ្រោងប្រកាសដាក់ឲ្យដំណើរការជាផ្លូវការ នៅថ្ងៃទី១៤ ខែវិច្ឆិកា ឆ្នាំ២០២៣ខាងមុខនេះ ដោយផ្តល់ជូនការសិក្សាដោយមិនបង់ប្រាក់ និងទទួលបានប្រាក់ឧបត្ថមបន្ថែមទៀតពីរាជរដ្ឋាភិបាល។ ដើម្បីទទួលបានការសិក្សានេះ យុវជនមកពីគ្រួសារក្រីក្រ និងគ្រួសារងាយរងហានិភ័យ ត្រូវមានអាយុយ៉ាងតិច១៥ឆ្នាំ និងអាចចុះ ឈ្មោះតាមឃុំ សង្កាត់ដែលខ្លួនរស់នៅ ឬនៅគ្រឹះស្ថានអប់រំ បណ្តុះបណ្តាលវិជ្ជាជីវៈ ឬតាមប្រព័ន្ធអេឡិចត្រូនិច៕ អត្ថបទ ៖ ឈិត បូរ៉ាវី