ភ្នំពេញ ៖ វត្តមានក្រសួងសង្គមកិច្ច អតីតយុទ្ធជន និងយុវនីតិសម្បទា និងក្រសួងសុខាភិបាល នៅថ្ងៃទី ២៦ ខែ តុលា ឆ្នាំ ២០២៣នេះ បានដាក់សម្ពោធគម្រោង ATScale ជាគម្រោងពង្រឹងសេវាស្តារលទ្ធភាពពលកម្មជូនជនមានពិការភាព និងសុខភាពភ្នែក។

​ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានលើកឡើងនៅក្នុងពិធីប្រកាសដាក់ឱ្យប្រើប្រាស់ជាផ្លូវការ គម្រោង ATScale ថាគម្រោងនេះ ពិតជាមានសារសំខាន់សម្រាប់ជនមានពិការភាពកម្ពុជា ពិសេសជនមានពិការភាពកាយសម្បទា និងជនមានពិការភាពភ្នែក ។

ឯកឧត្តមបន្តថា នេះជាការបង្ហាញពីការយកចិត្តទុកដាក់ និងជាឆន្ទៈរបស់រាជរដ្ឋាភិបាលកម្ពុជា ក្នុងការពង្រីក និងធ្វើឱ្យប្រសើរឡើងនូវហេដ្ឋារចនាសម្ព័ន្ធ សេវាស្តារលទ្ធភាពពលកម្ម ប្រកបដោយនិរន្តរភាពនៅកម្ពុជា និងមានគោលបំណងបំពាក់ឧបករណ៍បច្ចេកវិទ្យាជំនួយជូនជនមានពិការភាព។ លើសពីនេះ គឺធ្វើឱ្យប្រសើរឡើងនូវការគ្រប់គ្រងកម្មវិធី និងការសម្របសម្រួលភាពជាដៃគូក្នុងការអនុវត្តគម្រោងសេវាស្តារលទ្ធភាពពលកម្មជូនជនមានពិការភាពកាយសម្បទា និងជនមានពិការភាពភ្នែក ដែលត្រូវការជាប្រចាំ និងចាំបាច់នូវឧបករណ៍បច្ចេកវិទ្យាជំនួយសម្រាប់ការរស់នៅប្រចាំថ្ងៃ ។

ក្នុងពិធីសម្ពោធគម្រោង ATScale ដដែលនេះ ឯកឧត្តម ឈាង រ៉ា រដ្ឋមន្ត្រីក្រសួងសុខាភិបាល មានប្រសាសន៍ថា ការរីកចម្រើនវិស័យសុខាភិបាល ធ្វើឱ្យប្រជាជនកម្ពុជារស់នៅកាន់តែយូរ ប្រជាជនវ័យចំណាស់កាន់តែច្រើន។ ប៉ុន្តែ ក៏មានជំងឺមិនឆ្លងច្រើន ធ្វើឱ្យមានកំណើនជនមានពិការភាពផងដែរ ។ ឯកឧត្តមលើកឡើងពីគ្រោះថ្នាក់ចរាចរណ៍ ជំងឺទាំងឡាយ ដូចជាជំងឺទឹកនោមផ្អែមជាដើម ក៏ជាកត្តាសំខាន់នាំឱ្យមានពិការភាពដែរ ។

ឯកឧត្តម លើកឡើងដែរថា ចំពោះ គម្រោង ATScale នេះ ជាគម្រោងមួយ ដែលប្រកាសថា យើងនឹងមិនបោះបង់ជនមានពិការភាពណាម្នាក់ឡើយ ។ ឯកឧត្តមលើកឡើង គម្រោងនេះនឹងជួយជនមានពិការភាពរាប់ពាន់នាក់ តាមរយៈការផ្ដល់នូវសេវាស្ដារលទ្ធភាពពលកម្ម និងឧបករណ៍ជំនួយអវៈយវៈសម្បនិម្មិត។

ឯកឧត្តម លើកឡើងដែរថាចំពោះគម្រោង ATScale ដែលផ្តោតលើកម្មវិធីសុខភាពភ្នែកវិញ គឺនឹងបង្កើនចំនួនមណ្ឌលថែទាំភ្នែកបន្ថែមទៀត ជារៀងរាល់ឆ្នាំ ដើម្បីធ្វើយ៉ាងណាឱ្យគ្រប់ខេត្តទាំងអស់មានមណ្ឌលថែទាំភ្នែកដែលដំណើរការ និងផ្ដល់សេវាដោយសេវាសាធារណៈ។

អត្ថបទ៖ គឹមហុក