វីដេអូដែលថតបាន បង្ហាញពីទំហំនៃការបំផ្លាញបន្សល់ទុកដោយព្យុះសង្ឃរា Otis ដែល​បាន​វាយ​បក់​ឆ្លងកាត់ ទីក្រុង Acapulco ប្រទេសម៉ិកស៊ិក កាលពីថ្ងៃពុធ។ វីដេអូ អំពីសណ្ឋាគារ Hotsson ដែល​ត្រូវ​បានបំផ្លាញ បង្ហាញឲ្យឃើញបង្អួចរាប់សិបបានបាក់បែក ដើមឈើដួលរលំ និង​អាង​ហែល​ទឹក​មានដីល្បប់។

នៅក្នុងការបង្ហោះលើវេទិកា X ដែលត្រូវបានគេស្គាល់កាលពីពេលមុនថា Twitter សាក្សី​ដែល​បាន​ថត​វីដេអូ បាននិយាយថា មនុស្សជាច្រើន មានភាពភ័យខ្លាចរយៈពេល១ម៉ោង ខណៈព្យុះសង្ឃរា បាន​វាយបោកបក់មកលើសណ្ឋាគារ ជំរុញឲ្យទឹកឡើងដល់ជាន់ទី៨។

សូរសំឡេងខ្យល់គួឲ្យចាប់អារម្មណ៍ កញ្ចក់នៅក្នុងបន្ទប់បែកបាក់ ហើយ​សណ្ឋាគារ​រង្គើ​ហាក់​ដូច​ជា​ការ​រញ្ជួយដី។ រដ្ឋាភិបាលម៉ិកស៊ិក បាននិយាយកា​ល​ពី​ថ្ងៃ​ព្រហស្បតិ៍​បន្ទាប់​ពី​ព្យុះមួយ​ដ៏​មាន​ឥទ្ធិពល​បំផុត ពុំដែលធ្លាប់បានវាយប្រហារប្រទេសនេះ បានធ្វើឲ្យប៉ះពាល់ដល់ រមណីយដ្ឋានឆ្នេរ Acapulco បណ្តាលឲ្យមានការបំផ្លាញអាចមានរហូតដល់រាប់ពាន់លានដុល្លារ ថា ព្យុះសង្ឃរា Otis បានឆក់យកជីវិតមនុស្ស យ៉ាងហោចណាស់ ២៧នាក់ ។

ព្យុះសង្ឃរា Otis បានវាយប្រហារមកលើប្រទេសម៉ិកស៊ិក កាលពីថ្ងៃពុធ ជាប្រភេទព្យុះទី៥ បាន​ធ្វើ​ឲ្យ​ផ្លូវ​ជន់លិច បំប៉ើងដំបូលផ្ទះ និងសណ្ឋាគារ ជន់លិចរថយន្ត និងកាត់ផ្តាច់ទំនាក់ទំនង ផ្តាច់​ផ្លូវ និងដំណើរការផ្លូវអាកាស បំផ្លាញផ្លូវរថភ្លើងនៅទូទាំងទីក្រុង Acapulco ជាទី​ក្រុង​មាន​ពលរដ្ឋ​ជិត​ ៩០០.០០០នាក់។

រដ្ឋាភិបាលនិយាយថា មនុស្ស៤នាក់ទៀត នៅបាត់ខ្លួននៅឡើយ៕