កងកម្លាំងអ៊ីស្រាអែលបាន បើកការវាយប្រហារថ្មើរជើងដ៏ធំបំផុតលើតំបន់ហ្កាហ្សា(Gaza) ទាំងយប់អាធ្រាត្រថ្ងៃទី ២៦ ខែតុលា នៅក្នុងសង្គ្រាមរយៈពេល ២០ថ្ងៃរបស់ពួកគេជាមួយក្រុមហាម៉ាស ខណៈ កំហឹងបានពុះកញ្ជ្រោលកាន់តែខ្លាំងនៅក្នុងពិភពអារ៉ាប់ ជុំវិញការទម្លាក់គ្រាប់បែកឥតឈប់ឈររបស់អ៊ីស្រាអែលទៅលើទឹកដីប៉ាឡេស្ទីនដែលត្រូវបានឡោមព័ទ្ធ។
លោកនាយករដ្ឋមន្ត្រី បេន ចាមីន ណេតានយ៉ាហ៊ូ(Benjamin Netanyahu) បាននិយាយថា កងទ័ពអ៊ីស្រាអែលនៅត្រៀមសម្រាប់ការវាយលុយថ្មើរជើង ខណៈសហរដ្ឋអាមេរិក និងប្រទេសផ្សេងទៀតបានជំរុញឱ្យអ៊ីស្រាអែលពន្យារពេល ដោយបារម្ភថា វាអាចបញ្ឆេះអរិភាពលើតំបន់សមរភូមិជួរមុខនៅមជ្ឈិមបូព៌ាផ្សេងទៀត។
ទីភ្នាក់ងារអង្គការសហប្រជាជាតិដែលផ្តល់ជំនួយដល់ជនស៊ីវិលប៉ាឡេស្ទីន នៅតំបន់ហ្កាហ្សាបាននិយាយថា ខ្លួនប្រហែលជាត្រូវបិទប្រតិបត្តិការក្នុងពេលឆាប់ៗនេះ ប្រសិនបើគ្មានប្រេងឥន្ធនៈទៅដល់ទឹកដីគ្រប់គ្រងដោយក្រុមហាម៉ាស ស្របពេលមានតម្រូវការចាំបាច់យ៉ាងខ្លាំងបំផុតសម្រាប់ការផ្ដល់ទីជម្រក ទឹក អាហារ និងសេវាវេជ្ជសាស្រ្ត។
អ៊ីស្រាអែលបានទម្លាក់គ្រាប់បែកលើតំបន់ហ្កាហ្សា ដែលមានប្រជាជនរស់នៅច្រើនកុះករបន្ទាប់ពីការវាយប្រហាររបស់ក្រុមហាម៉ាសកាលថ្ងៃទី ៧ តុលា លើសហគមន៍អ៊ីស្រាអែល។ អ៊ីស្រាអែលនិយាយថា ក្រុមហាម៉ាសបានសម្លាប់មនុស្សប្រហែល ១.៤០០ នាក់ រួមទាំងកុមារ ហើយបានចាប់ចំណាប់ថ្នូរ ជាង ២០០ នាក់ មួយចំនួនជាទារក និងមនុស្សចាស់។ ក្រសួងសុខាភិបាលរបស់ហ្កាហ្សាបាននិយាយកាលពីថ្ងៃព្រហស្បតិ៍ថា ជនជាតិប៉ាឡេស្ទីនចំនួន ៧.០២៨នាក់ ត្រូវបានសម្លាប់នៅក្នុងការវាយប្រហារតាមអាកាសសងសឹក ក្នុងនោះមានកុមារចំនួន ២.៩១៣នាក់ ។ ក្រសួងការបរទេសអាមេរិក បាននិយាយថា ទីក្រុងវ៉ាស៊ីនតោន ដឹងថាមានមនុស្សស្លាប់ជាច្រើននាក់ នៅតំបន់ហ្កាហ្សា ប៉ុន្តែមិនមានការបញ្ជាក់ឯករាជ្យអំពីចំនួននោះទេ ហើយក៏មិនជឿជាក់លើតួលេខដែលចេញដោយក្រុមហាម៉ាសនោះដែរ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
