រដ្ឋមន្ត្រីការបរទេសអ៊ីរ៉ង់ លោក Hossein Amir-Abdollahian បាន​ព្រមាន​នៅ​អង្គការ​សហ​ប្រជាជាតិ ​កាលពីថ្ងៃព្រហស្បតិ៍ (២៦ តុលា) ថា ប្រសិនបើការសងសឹករបស់អ៊ីស្រាអែល ប្រឆាំង​នឹង​ពួកសកម្មប្រយុទ្ធប៉ាឡេស្ទីន ហាម៉ាស នៅតំបន់ហ្កាហ្សា ស្ទ្រីប មិនបានបញ្ចប់ទេនោះ សហរដ្ឋអាមេរិកនឹង «មិនរួចខ្លួនផុតពីភ្លើងសង្រ្គាមនេះទេ»។

លោក Amir-Abdollahian បានប្រាប់កិច្ចប្រជុំនៃមហាសន្និបាតសមាជិក ១៩៣រូប ស្តីពី​មជ្ឈិម​បូព៌ា​ថា «យើងនិយាយដោយត្រង់ទៅកាន់បណ្ដាមេដឹកនាំសហរដ្ឋអាមេរិក ដែល​ឥឡូវ​នេះ​កំពុង​រៀបចំ​អំពើប្រ​ល័យពូជសាសន៍នៅប៉ាឡេស្ទីន ថា យើងមិនស្វាគមន៍ ការពង្រីក​នៃ​សង្រ្គាម​នៅ​ក្នុង​តំបន់​នោះទេ​ ប៉ុន្តែប្រសិនបើអំពើប្រល័យពូជសាសន៍នៅតំបន់ហ្កាហ្សា នៅតែបន្ត នោះ​ពួក​គេ​ក៏​នឹង​គេច​មិនផុតពីភ្លើងដ៏ក្ដៅនេះដែរ»។

អ៊ីស្រាអែល បានប្តេជ្ញាថានឹងកច្ចាត់ក្រុមហាម៉ាស ដែលគ្រប់គ្រងតំបន់ហ្កាហ្សា ឲ្យបាត់ពីផែនដី ជា​ការ​សង​សឹកចំពោះការវាយប្រហារថ្ងៃទី ៧ តុលា ដែលបានសម្លាប់ពលរដ្ឋអ៊ីស្រាអែលចំនួន ១.៤០០​នាក់ និងបានឃើញមនុស្សរាប់រយនាក់ទៀត ត្រូវបានចាប់ជាចំណាប់ថ្នូរ។ អ៊ីស្រាអែល​បាន​វាយ​លុក​លើតំបន់ហ្កាហ្សា ពីលើអាកាសជាច្រើនដង ដោយបាន​ដាក់​ការ​ឡោម​ព័ទ្ធ​លើ​តំបន់​នេះ ​និងកំពុងរៀបចំការវាយលុកថ្មើរជើង។ ក្រុមអាជ្ញាធរប៉ាឡេស្ទីននិយាយថា មនុស្សជាង ៧.០០០នាក់ត្រូវបានសម្លាប់។

លោក Amir-Abdollahian បាននិយាយថា ក្រុមហាម៉ាស បានប្រាប់ប្រទេសអ៊ីរ៉ង់ ថា ក្រុម​នេះ​បាន​ត្រៀមខ្លួ​នរួចជាស្រេចក្នុងការដោះលែងចំណាប់ថ្នូរជនស៊ីវិល ដោយបន្ថែមថា ពិភព​លោក​គួរ​តែ​ជំរុញ​ឱ្យ​មានការដោះលែងជនជាតិប៉ាឡេស្ទីន ចំនួន៦.០០០នាក់ ដែលជាប់នៅ​ក្នុង​ពន្ធនាគារ​អ៊ីស្រាអែល ជាការដោះដូរជាមួយអ្នកចាប់ខ្លួនទាំងនោះ៕