យោងតាមនគរបាលក្នុងតំបន់បានឱ្យដឹងថា មនុស្ស ៥នាក់ ត្រូវបានគេបាញ់​សម្លាប់នៅ​ឯលំនៅ​ឋាន​មួយ​ខ្នង នៅភាគអាគ្នេយ៍នៃរដ្ឋ North Carolina របស់សហរដ្ឋអាមេរិក កាលពី​ព្រឹក​ថ្ងៃ​ព្រហស្បតិ៍ (២៦ តុលា)។

លោក Jimmy Thornton មេបញ្ជាការនគរបាលតំបន់ Sampson បាននិយាយថា ភ្នាក់ងារ​នគរបាល​ទទួល​បានការហៅទូរស័ព្ទទៅកាន់លំនៅឋានមួយខ្នង នៅផ្លូវហ្គាឡែន ហាយវេ (Garland Highway) ភ្លាមៗមុនម៉ោង ១យប់ សម្រាប់របាយការណ៍នៃករណីឃាតកម្មមួយ ហើយ​បានរកឃើញមនុស្ស ៥នាក់បានស្លាប់ដោយសារត្រូវគ្រាប់កាំភ្លើង។

លោក Thornton បាននិយាយនៅក្នុងសេចក្តីប្រកាសព័ត៌មានមួយថា ក្រុមអ្នក​ស៊ើប​អង្កេត​មិន​មាន​ព័ត៌មាន​ណាមួយអំពីជនសង្ស័យ និងមិនដឹងថា តើអ្នកស្លាប់ទាំងនោះ ស្គាល់គ្នា​ដោយ​របៀប​ណា​នោះ​ទេ។

ប្រមុខនគរបាល លោក Eric Pope បាននិយាយនៅក្នុងសន្និសីទសារព័ត៌មានមួយថា ជន​រង​គ្រោះ​ទាំង​នោះ រួមមានបុរស ៤នាក់ និងស្ត្រីម្នាក់ ដែលមានវ័យចាប់ពីពាក់កណ្តាលអាយុ ៣០ឆ្នាំ ដល់ ៨០ឆ្នាំ។

ការិយាល័យតម្រួតនគរបាល មិនបានឆ្លើយតបជាមួយនឹងព័ត៌មានបន្ថែមទេ រួមទាំង​ថា​តើ​ករណី​ឃាតកម្ម​នេះ​កំពុងត្រូវបានស៊ើបអង្កេតថាជាការសម្លាប់រង្គាល ឬយ៉ាងណា ព្រោះក្រុមភ្នាក់ងារ​ពិសេស​ FBI បានកំណត់ថា ការបាញ់សម្លាប់មនុស្ស ៤នាក់ឬច្រើនជាងនេះ ដោយ​មិន​រាប់​បញ្ចូល​អ្នក​បាញ់​ប្រហារណាមួយក្នុងរយៈពេល ២៤ម៉ោង គឺជាករណី​សម្លាប់​រង្គាល​ សម្រាប់​សហរដ្ឋ​អាមេរិក​៕