បាត់ដំបង៖ ស្នងការនគរបាលខេត្តបាត់ដំបង បានសម្រេចផ្អាកការងារមេបញ្ជាការវរសេនាតូចនគរបាលការពារព្រំដែនគោក លេខ៨២៣ ជាបណ្ដោះអាសន្ន ក្រោយប្រើប្រាស់អំពើហិង្សាលើកូនចៅរបស់ខ្លួន។
លោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង ចុះថ្ងៃទី០៣ ខែមិថុនា នេះ បានសម្រេចថា «ត្រូវបានផ្អាកការងារបណ្ដោះអាសន្នចំពោះលោកវរសេនីយ៍ឯក យឹម វិចិត្រ អត្តលេខ ០៧៧៤៦ ឋានៈ មេបញ្ជាការ នៃវរសេនាតូចនគរបាលការពារ ព្រំដែនគោកលេខ៨២៣ ដែលបានប្រព្រឹត្តិល្មើសវិន័យរបស់កងកម្លាំងនគរបាលជាតិ» ។
លោកឧត្តមសេនីយ៍ទោ សាត គឹមសាន បានកំណត់ឲ្យលោកវរសេនីយ៍ឯក យឹម វិចិត្រ ត្រូវបង្ហាញមុខនៅការិយាល័យបុគ្គលិករៀងរាល់ម៉ោងធ្វើការ ដើម្បីកែប្រែកំហុសឆ្គង និងរង់ចាំការសម្រេចជាថ្មី។
ទន្ទឹមនឹងការផ្អាកការងារលោកវរសេនីយ៍ឯក យឹម វិចិត្រ អត្តលេខ ០៧៧៤៦ ឋានៈ មេបញ្ជាការ នៃវរសេនាតូចនគរបាលការពារ ព្រំដែនគោកលេខ៨២៣ ជាបណ្ដោះអាសន្ននោះ លោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង បានប្រគល់ភារកិច្ចជូនលោកវរសេនីយ៍ទោ មាស មឿន អត្ថលេខ៥១៨៨៤ ឋានៈ មេបញ្ជាការរងវរសេនាតូចនគរបាលការពារ ព្រំដែនគោកលេខ៨២៣ ឱ្យដឹកនាំការងារជំនួសសិន៕
អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
