ភ្នំពេញ៖ ក្រសួងសុខាភិបាល បានលើកទឹកចិត្តឱ្យអ្នកជំនាញរួមគ្នា​អភិវឌ្ឍន៍​គុណភាពសេវា​ថែទាំ​ព្យាបាលទារក និងកុមារឱ្យកាន់តែប្រសើរប្រកបដោយគុណភាព ​ប្រសិទ្ធិភាព និងទំនុកចិត្តជូនដល់ប្រជាពលរដ្ឋ។

ក្នុងពិធីប្រកាសបើកសន្និសីទរោគកុមារលើកទី៥ ក្រោមប្រធានបទ «រួមគ្នាអភិវឌ្ឍគុណភាពសេវា​ថែទាំ​ព្យាបាលទារក និងកុមារ» របស់មន្ទីរពេទ្យកុមារជាតិ ​នៅព្រឹកថ្ងៃទី២៧ ខែតុលា ឆ្នាំ២០២៣នេះ លោកជំទាវសាស្ត្រាចារ្យ អ៊ឹម សិទ្ធិការ្យ រដ្ឋលេខាធិការ ​តំណាងឯកឧត្តមសាស្រ្ដាចារ្យ ឈាង រ៉ា រដ្ឋមន្ត្រីក្រសួងសុខាភិបាល ​បានថ្លែងថា ​ការរៀបចំសន្និសីទនេះធ្វើឡើងក្នុងគោលបំណង ដើម្បីលើក​កម្ពស់ និងជំរុញការអភិវឌ្ឍវិជ្ជាជីវៈបន្តសម្រាប់បុគ្គលិកសុខាភិបាល​ តាមរយៈការផ្លាស់ប្តូរ បទ​ពិសោធន៍ នៃការអនុវត្តគ្លីនិក រវាងថ្នាក់ជាតិ និងថ្នាក់ខេត្ត រួមគ្នាអភិវឌ្ឍន៍​គុណភាពសេវា​ថែទាំព្យាបាលទារក ​និងកុមារឲ្យកាន់តែប្រសើរ ប្រកបដោយគុណភាព ​ប្រសិទ្ធិភាព និងទំនុកចិត្តជូនដល់ប្រជាពលរដ្ឋកម្ពុជា។

លោកជំទាវសាស្ត្រាចារ្យ បានបន្តទៀតថា មន្ទីរពេទ្យកុមារជាតិ​ បានយកចិត្តទុកដាក់លើកកម្ពស់ ទាំងគុណភាព សុវត្ថិភាព វប្បធម៌សហភាតរៈចំណងសាមគ្គីភាព និងផ្តល់តម្លៃឱ្យគ្នាទៅវិញទៅមក តាមជំនាញឯកទេសនីមួយៗក្នុងវិជ្ជាជីវៈសុខាភិបាលតែមួយ ហើយក៏បង្ហាញឱ្យឃើញ​ពី​ការរួបរួមសាមគ្គីគ្នាយ៉ាងសស្រាក់ សស្រាំ​ ក្នុងការស្វែងយល់ និងរៀនសូត្រពីគ្នាទៅវិញទៅមក ដែល​ជាវប្បធម៌ចែករំលែកប្រកបដោយសន្តិភាព ​និងឈានទៅរកការអភិវឌ្ឍ និងឈ្នះៗទាំងអស់គ្នា។

ឯកឧត្តមសាស្រ្តាចារ្យ ញឹប អង្គាបុស្ស នាយកមន្ទីរពេទ្យកុមាជាតិ ​បានប្តេជ្ញាចិត្តថា ថ្នាក់ដឹកនាំ និងបុគ្គលិក​ និងអ្នកផ្តល់សេវាកម្មផ្សេងៗទាំងអស់ក្នុងមន្ទីរពេទ្យកុមារជាតិ នៅតែបន្តខិតខំប្រឹងប្រែង​ដោយយកចិត្តទុកដាក់ ​និងចូលរួមយ៉ាងសកម្មក្នុងការពង្រឹងគុណភាព ​សមត្ថភាព និង​បង្កើន​មិត្តភាព​ជាមួយដៃគូរអភិវឌ្ឍនានា ដើម្បីផ្តល់ជូននូវសេវាសុខាភិបាលសាធារណៈដល់​ប្រជាពលរដ្ឋ​ឲ្យកាន់តែមានទំនុកចិត្ត ក្រោមយុទ្ធសាស្ត្រដឹកនាំរបស់ក្រសួងសុខាភិបាល។

គួរបញ្ជាក់ផងដែរថា វាគ្មិនអន្តរជាតិ ថ្នាក់ជាតិ ថ្នាក់ខេត្ត ស្រុកជាច្រើន បានមកចូលរួមចែករំលែក​ចំណេះដឹង ​និង​បទពិសោធន៍​នៅក្នុង​សន្និសីទនេះ ​មានដូចជា៖ វាគ្មិន​មកពីព្រះរាជាណាចក្រថៃ នៃ​សាកលវិទ្យាល័យថាម៉ាសាត វាគ្មិនមកពីមន្ទីរពេទ្យកាល់ម៉ែត មន្ទីរពេទ្យកុមារជាតិ និង​វាគ្មិនមកពីមន្ទីរពេទ្យបង្អែកខេត្តស្ទឹងត្រែង ​កំពង់ធំ ពោធិ៍សាត់ ព្រៃវែង មន្ទីរពេទ្យបង្អែកស្រុក​សំពៅលូន មន្ទីរពេទ្យមង្គលបូរី ដែលសុទ្ធតែជាអ្នកកំពុងតែបំរើការ​នៅផ្នែកកុមារទារក៕ អត្ថបទ រដ្ឋា