ព្រៃវែង៖ រដ្ឋបាលខេត្តព្រៃវែង បានប្រកាសថា ប្រជាពលរដ្ឋ ៥០នាក់ទៀត ត្រូវបានរកឃើញឆ្លងមេរោគកូវីដ-១៩កាលពីថ្ងៃម្សិលមិញនេះ ដែលភាគច្រើនត្រូវបានរកឃើញលើប្រជាពលរដ្ឋនៅក្នុងស្រុកព្រះស្ដេច។
ក្នុងសេចក្ដីជូនដំណឹងរបស់ខ្លួន រដ្ឋបាលខេត្តព្រៃវែង បានបញ្ជាក់ថា ករណីឆ្លងថ្មីទាំងអស់នេះ ត្រូវបានរកឃើញលើប្រជាពលរដ្ឋនៅស្រុកព្រះស្ដេចចំនួន ២៨នាក់ បន្ទាប់មកស្រុកកំពង់ត្របែក រកឃើញពលរដ្ឋ ៦នាក់ទៀតឆ្លងមេរោគនេះផងដែរ ខណៈស្រុកពារាំង រកឃើញករណីឆ្លងថ្មី ៤នាក់ទៀត។
សម្រាប់ស្រុកមេសាង និងស្វាយអន្ទរ រដ្ឋបាលខេត្តព្រៃវែង បានបញ្ជាក់ថា បានរកឃើញករណីឆ្លងថ្មី ៣នាក់ទៀតនៅក្នុងស្រុកនីមួយៗ ហើយស្រុកពាមរក៍ រកឃើញអ្នកឆ្លងថ្មី ២នាក់ទៀត។
ចំណែកឯស្រុក និងក្រុងចំនួន ៤ទៀត រកឃើញករណីឆ្លងថ្មីត្រឹមតែ ១នាក់ប៉ុណ្ណោះនៅក្នុងស្រុកនីមួយៗ មានស្រុកបាភ្នំ ស្រុកពាមជរ ស្រុកកញ្ច្រៀច និងក្រុងព្រៃវែង។
គិតត្រឹមថ្ងៃម្សិលមិញនេះ ពលរដ្ឋដល់ទៅ ៦៩៩នាក់ហើយត្រូវបានរកឃើញឆ្លងមេរោគកូវីដ-១៩នៅទូទាំងខេត្តព្រៃវែង ក្នុងនោះអ្នកជំងឺចំនួន ៧នាក់ បានស្លាប់ ខណៈអ្នកជំងឺ ២៧៩នាក់ទៀត ត្រូវបានព្យាបាលជាសះស្បើយឡើងវិញ ហើយអ្នកជំងឺចំនួន ៤១៣នាក់ទៀត កំពុងស្ថិតក្រោមការព្យាបាលបន្ត៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
