ប្រធានាធិបតី វ៉្លាឌីមៀរ ពូទីន (Vladimir Putin) កាលពីថ្ងៃព្រហស្បតិ៍ (ទី២៦ ខែតុលា) បាននិយាយថា ផ្នែកទី១នៃស្ថានីយគន្លងតារាវិថីថ្មីរបស់ប្រទេសរុស្ស៊ី ដែលទីក្រុងម៉ូស្គូមើលឃើញថា ជាការអភិវឌ្បដ៏សមហេតុសមផលនាពេលបន្ទាប់ នៅក្នុងការរុករកអវកាស បន្ទាប់ពីស្ថានីយអវកាសអន្តរជាតិ (ISS) គួរតែត្រូវបានដាក់ឲ្យដំណើរការ នៅឆ្នាំ២០២៧។

ទីភ្នាក់ងារសារព័ត៌មានរុស្ស៊ី បានរាយការណ៍ថា ក្នុងជំនួបជាមួយបណ្ដាមន្ត្រីឧស្សាហកម្មអវកាស លោក ពូទីន ក៏បានប្តេជ្ញាបន្តកម្មវិធីទៅភពព្រះចន្ទរបស់រុស្ស៊ី បើទោះបីជាមានការបរាជ័យ កាលខែសីហា ជុំវិញការចុះចតលើភពព្រះចន្ទជាលើកដំបូង ក្នុងរយៈពេល ៤៧ឆ្នាំក៏ដោយ។

លោកពូទីនបាននិយាយថា ការសម្រេចចិត្តរបស់ទីក្រុងម៉ូស្គូ ក្នុងការបន្តការចូលរួមឆ្នាំ២០២៨ របស់ខ្លួននៅក្នុងស្ថានីយអវកាសអន្តរជាតិ (ISS) ដែលឥឡូវនេះមានអាយុកាល ២៥ឆ្នាំហើយនោះ គឺជាវិធានការបណ្តោះអាសន្ន។

លោក ពូទីន ត្រូវបានគេដកស្រង់សម្តី ដែលនិយាយអំពីស្ថានីយគន្លងតារាវិថីថ្មីរបស់រុស្ស៊ីថា៖ «នៅពេលដែលធនធាននៅស្ថានីយអវកាសអន្តរជាតិអស់ យើងមិនមែនត្រូវការត្រឹមតែផ្នែកមួយប៉ុណ្ណោះទេ ប៉ុន្តែយើងត្រូវការស្ថានីយទាំងមូលយកមកប្រើប្រាស់។ ហើយនៅឆ្នាំ២០២៧ ផ្នែកទី១ គួរតែត្រូវបានដាក់នៅក្នុងគន្លងតារាវិថី»។

លោកបាននិយាយថា ការអភិវឌ្ឍស្ថានីយ ត្រូវតែដំណើរការ «ទាំងអស់ក្នុងពេលវេលាល្អសមរម្យ» បើពុំនោះទេកម្មវិធីរបស់រុស្ស៊ី ប្រឈមនឹងហានិភ័យនៃការយឺតយ៉ាវផ្នែកការអភិវឌ្ឍការហោះហើរអវកាស ដែលមានអាកាសយានិក៕