នៅមុនកិច្ចពិភាក្សាស្តីពីបញ្ហាអាកាសធាតុ COP28 នាខែក្រោយ មន្ត្រីអាកាសធាតុចិន បាននិយាយនៅថ្ងៃសុក្រ (ទី២៧ ខែតុលា) នេះថា បណ្ដាប្រទេសនានា ត្រូវតែចៀសវាងពីការ «មានត្រឹមតែពាក្យស្លោក» ហើយជំនួសមកវិញជាមួយនឹងការអនុវត្តវិធីសាស្ត្រជាក់ស្តែង ចំពោះបម្រែបម្រួលអាកាសធាតុ ដែលឆ្លុះបញ្ចាំងពីការការគិតគូរដល់កង្វល់នានា ដូចជាសន្តិសុខថាមពល ការងារ និងកំណើន។

ជុំចុងក្រោយបំផុតនៃកិច្ចពិភាក្សាអំពីអាកាសធាតុពិភពលោក គ្រោងនឹងចាប់ផ្តើមនៅទីក្រុងឌូបៃ ប្រទេសអារ៉ាប់រួម នៅចុងខែវិច្ឆិកា ដោយការជជែកដេញដោលនោះផ្តោតលើចន្លោះប្រហោង ក្នុងការអនុវត្តកិច្ចព្រមព្រៀងក្រុងប៉ារីសឆ្នាំ២០១៥។

«ការវាយតម្លៃសកល» ដែលត្រូវបានបោះពុម្ពផ្សាយដោយអង្គការសហប្រជាជាតិ ក្នុងខែកញ្ញា បានបង្ហាញថា ពិភពលោកបាននៅឆ្ងាយពីគោលដៅពាក់ព័ន្ធនឹងអាកាសធាតុ ហើយសកម្មភាព តម្រូវឲ្យមានពី «គ្រប់ទិសទីទាំងអស់» ដើម្បីរក្សាសីតុណ្ហភាពកុំឲ្យកើនឡើងលើស ១,៥អង្សាសេ។

លោក Xia Yingxian ប្រធានការិយាល័យអាកាសធាតុ នៅក្រសួងអេកូឡូជី និងបរិស្ថានរបស់ប្រទេសចិន បាននិយាយថា បណ្ដាប្រទេសអ្នកមានគួរតែបំពេញការសន្យារបស់ខ្លួន ក្នុងការផ្តល់ហិរញ្ញប្បទានអាកាសធាតុប្រចាំឆ្នាំចំនួន ១០០ពាន់លានដុល្លារ សម្រាប់ប្រទេសក្រីក្រ ដោយបញ្ចប់ទាំងស្រុងនូវការបង្កើតយន្តការហិរញ្ញវត្ថុសម្រាប់ «ការបាត់បង់ និងការខូចខាត» ហើយនិងមូលនិធិបន្សាំ ២ដង។

លោកបានប្រាប់សន្និសីទសារព័ត៌មាន នៅទីក្រុងប៉េកាំងថា «ប្រទេសអភិវឌ្ឍន៍ មានទំនួលខុសត្រូវ ដែលមិនអាចដោះស្រាយបាន ចំពោះបម្រែបម្រួលអាកាសធាតុពិភពលោក ហើយក្នុងពេលជាមួយគ្នានេះ ក៏មានលទ្ធភាពយ៉ាងពិតប្រាកដ ក្នុងការដោះស្រាយជាមួយនឹងបម្រែបម្រួលអាកាសធាតុនេះ»។

លោក Xia បាននិយាយថា កិច្ចពិភាក្សា COP28 ចាំបាច់ត្រូវគោរពដល់ «ចំណុចចាប់ផ្តើមផ្សេងៗគ្នា និងស្ថានភាពជាតិនៃប្រទេសនីមួយៗ»។ លោកបានប្រាប់ថា៖ «ពាក្យស្លោកឥតន័យ ឬការមានត្រឹមតែពាក្យស្លោក ដែលមានភាពខុសស្រឡះពីការពិត និងដែល«ស័ក្តិសមគ្រប់យ៉ាង» ហាក់ដូចជាបង្ហាញពីមហិច្ឆតា ប៉ុន្តែវាធ្វើឲ្យប៉ះពាល់ដល់ដំណើរការពហុភាគីនៃការដោះស្រាយ ចំពោះបម្រែបម្រួលអាកាសធាតុ»៕