យោធាអាមេរិក បានធ្វើការវាយប្រហារលើមូលដ្ឋានចំនួនពីរ នៅភាគខាងកើតប្រទេសស៊ីរីភាគខាងកើត ដែលប្រើប្រាស់ដោយក្រុមគាំទ្រដោយអ៊ីរ៉ង់ ក្នុងការសងសឹកចំពោះការវាយប្រហារនាពេលថ្មីៗនេះប្រឆាំងនឹងកងកម្លាំងអាមេរិក នៅក្នុងប្រទេសអ៊ីរ៉ាក់ និងស៊ីរី។

រដ្ឋមន្ត្រីការពារជាតិលោក Lloyd Austin បាននិយាយនៅក្នុងសេចក្តីថ្លែងការណ៍មួយ កាលពីយប់ថ្ងៃព្រហស្បតិ៍ថា៖«សហរដ្ឋអាមេរិក មិនស្វែងរកជម្លោះ និងមិនមានចេតនា ឬមានបំណងចង់ចូលរួមក្នុងអរិភាពបន្ថែមទៀតនោះទេ ប៉ុន្តែការវាយប្រហារដែលគាំទ្រដោយអ៊ីរ៉ង់ទាំងនេះប្រឆាំងនឹងកងកម្លាំងសហរដ្ឋអាមេរិក គឺមិនអាចទទួលយកបាន ហើយត្រូវតែបញ្ឈប់» ។

ក្រុមមន្ត្រីអាមេរិកកាលពីយប់ថ្ងៃព្រហស្បតិ៍ បានប្រាប់អ្នកសារព័ត៌មានថា ការវាយប្រហារ ត្រូវបានធ្វើឡើងដោយយន្តហោះ F-16 ពីរគ្រឿងប្រឆាំងនឹងកន្លែងផ្ទុកអាវុធ និងកន្លែងផ្ទុកគ្រាប់រំសេវ នៅជិតទីក្រុង Abu Kamal ក្នុងប្រទេសស៊ីរី។

មន្ទីរបញ្ចកោណ បានឲ្យដឹងថា ក្រុមដែលគាំទ្រដោយអ៊ីរ៉ង់ បានកំណត់គោលដៅលើកងកម្លាំងសហរដ្ឋអាមេរិកនៅក្នុងប្រទេសអ៊ីរ៉ាក់ និងស៊ីរី ជាមួយនឹងយានដ្រូន និងគ្រាប់រ៉ុក្កែត យ៉ាងហោចណាស់ ១៦ដងចាប់តាំងពីថ្ងៃទី១៧ ខែតុលា។ ការវាយប្រហារចុងក្រោយបំផុត បានកើតឡើងកាលពីថ្ងៃព្រហស្បតិ៍ នៅក្នុងទីក្រុង Erbil ប្រទេសអ៊ីរ៉ាក់ ប៉ុន្តែមិនបណ្តាលឲ្យមានអ្នករងរបួសនោះទេ។