អាជ្ញាធរនៅថ្ងៃសៅរ៍ (ថ្ងៃទី២៨ ខែតុលា) បានជំរុញឲ្យ មនុស្សរាប់ពាន់នាក់នៅក្នុងរដ្ឋឃ្វីនស្លែនដ៍ (Queensland)របស់អូស្ត្រាលីជម្លៀសចេញ ខណៈដែលភ្លើងចំហេះព្រៃ ដែលបានបំផ្លាញផ្ទះយ៉ាងហោចណាស់ ៣០ខ្នង បានបន្តគំរាមកំហែងដល់ទីក្រុងជនបទ។

អាជ្ញាធរពន្លត់អគ្គិភ័យ បានឲ្យដឹងថា ភ្លើងចំហេះព្រៃ៣៥កន្លែង បានកំពុងឆេះ នៅថ្ងៃសៅរ៍នេះក្នុងរដ្ឋឃ្វីនស្លែនដ៍ ជាមួយនឹងទីប្រជុំជន Tara ប្រហែល ៨៩០ គីឡូម៉ែត្រ (៥៥០ម៉ាយ) ភាគខាងជើងនៃរដ្ឋធានី Brisbane ក្នុងចំណោមតំបន់ ដែលមានហានិភ័យខ្ពស់បំផុត។

ប្រទេសអូស្ត្រាលី ប្រឈមនឹងរដូវកាលភ្លើងចំហេះព្រៃ ដែលមានហានិភ័យខ្ពស់ បន្ទាប់ពីការចាប់ផ្តើមនៃព្រឹត្តិការណ៍អាកាសធាតុ El Nino ដែលត្រូវបានផ្សារភ្ជាប់ជាមួយនឹងព្រឹត្តិការណ៍ធ្ងន់ធ្ងរដូចជាភ្លើងចំហេះព្រៃ ព្យុះស៊ីក្លូន និងគ្រោះរាំងស្ងួត។

សេវាពន្លត់អគ្គិភ័យ និងសង្គ្រោះបន្ទាន់នៃរដ្ឋឃ្វីនស្លែនដ៍ បានចេញការព្រមានអំពីភ្លើងចំហេះព្រៃជាបន្ទាន់មួយនៅថ្ងៃសៅរ៍នេះ ដែលរួមមានទីប្រជុំជនTara ដែលមានប្រជាជនប្រហែល ៣.៨០០ នាក់ ដោយជំរុញឲ្យ អ្នកស្រុក«ចាកចេញជាបន្ទាន់»។