រដ្ឋមន្ត្រីហិរញ្ញវត្ថុទីមួយរបស់ប្រធានាធិបតីម៉ិកស៊ិក លោក Andres Manuel Lopez Obrador បានចេញសេចក្តីសម្រេចដ៏ម៉ឺងម៉ាត់លើគោលនយោបាយថាមពលរបស់អតីតចៅហ្វាយនាយរបស់ខ្លួន ដោយពណ៌នាថា វាមានគ្រោះថ្នាក់ដល់ប្រទេស ហួសសម័យ និងបំផ្លាញទំនុកចិត្តវិនិយោគិន។

លោក Carlos Urzua ដែលបានបម្រើការជារដ្ឋមន្ត្រីហិរញ្ញវត្ថុចន្លោះឆ្នាំ ២០១៨ និង ២០១៩ បានបង្ហាញពីការជំរុញរបស់លោក Lopez Obrador ក្នុងការរឹតបន្តឹងការគ្រប់គ្រងនៃថាមពលរបស់រដ្ឋនៅក្នុងបទសម្ភាសន៍ជាមួយសារព័ត៌មានរ៉យទ័រនៅសប្តាហ៍នេះ បន្ទាប់ពីបានចូលរួមក្នុងយុទ្ធនាការប្រឆាំងសម្រាប់ការបោះឆ្នោតប្រធានាធិបតីឆ្នាំ២០២៤ ។

លោក Lopez Obrador បានចាប់ផ្តើមធ្វើសេរីភាវូបនីយកម្មនៃទីផ្សារថាមពល ចាប់តាំងពីចូលកាន់តំណែងក្នុងខែធ្នូ ឆ្នាំ ២០១៨ ដោយបានបញ្ជាក់ថា រដ្ឋាភិបាលកន្លងមក បានបំប្លែងគោលនយោបាយដើម្បីផលប្រយោជន៍ឯកជន ហើយបានផ្លាស់ប្តូរ ដើម្បីពង្រឹងក្រុមហ៊ុនថាមពលរដ្ឋរបស់ប្រទេសនេះ។

គោលនយោបាយនេះ បានធ្វើឲ្យដៃគូពាណិជ្ជកម្មសំខាន់ៗរបស់ម៉ិកស៊ិក មិនសប្បាយចិត្ត ដោយបង្កឲ្យមានជម្លោះជាមួយសហរដ្ឋអាមេរិក និងកាណាដា ដែលអះអាងថា រដ្ឋបាលលោក Lopez Obrador បំពានលើកាតព្វកិច្ចពាណិជ្ជកម្មរបស់ខ្លួន និងរើសអើងក្រុមហ៊ុនរបស់ពួកគេ។