អន្តរជាតិ៖ កាលពីថ្ងៃអាទិត្យម្សិលមិញ ក្រុមប្រឆាំងនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានជួបជុំគ្នានៅក្នុងទីក្រុងតែល អាវីវ ដោយសង្ឃឹមថានឹងអាចត្រួសត្រាយផ្លូវបង្កើតរដ្ឋាភិបាលចម្រុះថ្មី។
មេដឹកនាំក្រុមប្រឆាំង លោក យែ ឡាភីត និងដៃគូសំខាន់របស់លោក គឺលោក ណាហ្វតាលី បេនណេត បានប្រកាសថា ពួកគេបានឈានដល់ការព្រមព្រៀងគ្នាមួយ ដើម្បីបង្កើតរដ្ឋាភិបាលថ្មី និងទទួលបានសំឡេងភាគច្រើននៅក្នុងសភា ដែលមាន ១២០អាសនៈ កាលពីថ្ងៃពុធសប្តាហ៍មុន។
រដ្ឋាភិបាលចម្រុះថ្មីនេះ មាន ៨គណបក្ស និងមានសំឡេងគ្រប់គ្រាន់ ៥០+១ដើម្បីបញ្ចប់រជ្ជកាលរយៈពេល ១២ឆ្នាំក្នុងនាមជានាយករដ្ឋមន្ត្រីអ៊ីស្រាអែលរបស់លោក ណេតាន់យ៉ាហ៊ូ។
ប៉ុន្តែ រដ្ឋាភិបាលចម្រុះថ្មីដ៏ផុយស្រួយនេះ នៅប្រឈមផ្លូវដ៏លំបាកបន្ថែមទៀត ដោយពួកគេមិនអាចទម្លាក់តំណែងប្រធានសភា ដែលជាសម្ព័ន្ធមិត្តរបស់លោក ណេតាន់យ៉ាហ៊ូ កាលពីថ្ងៃព្រហស្បតិ៍ ហើយគេនៅមិនទាន់ច្បាស់នោះទេថាតើនឹងមានរឿងរ៉ាវអ្វីខ្លះទៀត នឹងកើតឡើងនៅក្នុងរយៈពេលប៉ុន្មានថ្ងៃទៀតនេះ។
ខណៈពេលនោះដែរ លោកបេនណេត ដែលត្រូវបានគេចាត់តាំងឲ្យក្លាយជានាយករដ្ឋមន្ត្រីបន្ទាប់របស់អ៊ីស្រាអែល បានរងសំពាធយ៉ាងខ្លាំងពីក្រុមអ្នកនយោបាយស្តាំនិយមផ្សេងទៀត ដែលបានចោទប្រកាន់រូបលោកពីបទក្បត់គ្នាឯង។
ក្រោមការព្រមព្រៀងគ្នាលើរដ្ឋាភិបាលចម្រុះដែរ លោកឡាភីត និងលោក បេនណេត នឹងចែករំលែកការងារជានាយករដ្ឋមន្ត្រីម្នាក់ម្តង ដោយផ្អែកលើរូបមន្តផ្លាស់ប្តូរតំណែងគ្នាម្តងម្នាក់៕ អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
