ភ្នំពេញ ៖ សម្រាប់រយៈពេលប្រមាណ ១សប្ដាហ៍ដែលខណ្ឌដង្កោ ក៏ដូចជាបណ្ដាខេត្តជាច្រើននៅកម្ពុជា រងគ្រោះធម្មជាតិទឹក ជំនន់ វត្តមានកងកម្លាំងចម្រុះជាច្រើនបានចុះបំពេញការងារភ្លាមៗជួយសង្គ្រោះជីវិត និងជម្លៀសប្រជាពលរដ្ឋមកទីទួល សុវត្ថិភាព។ ក្នុងបេសកកម្មនេះ ក៏មានវត្តមានរបស់ក្រុមយុវជនជាច្រើន រួមចំណែកជួយទៅតាមលទ្ធភាពដែលខ្លួន អាច បំពេញបានផងដែរ។
ក្នុងបេសកកម្មជួយសង្គ្រោះជីវិត និងជម្លៀសប្រជាពលរដ្ឋពីទឹកជំនន់ទៅទីទួលសុវត្ថិភាព ក្រៅពីសកម្មភាពស្នូលរបស់កងកម្លាំងចម្រុះជាច្រើន ក៏មានការរួមចំណែកជាកម្លាំង ក៏ដូចជា ការឧបត្ថម្ភផ្សេងៗជួយដល់ប្រជាពលរដ្ឋរងគ្រោះ និងកងកម្លាំងពីសំណាក់ក្រុមយុវជនជាច្រើនក្រុមផងដែរ។ ជាក់ស្ដែងក្នុងរយៈពេលប៉ុន្មានថ្ងៃមកនេះ នៅចំណុចទីទួលសុវត្ថិភាពមុខផ្សារព្រែកជ្រៃ ក្នុងខណ្ឌដង្កោ វត្តមានរបស់យុវជន សហភាពសហព័ន្ធយុវជនកម្ពុជា វត្តមានរបស់យុវជនកាកបាទក្រហមកម្ពុជា រួមទាំងវត្តមានរបស់ក្រុមយុវជនផ្សេងទៀត បានចូលរួមបំពេញសកម្មភាពការងារជាប្រចាំទៅតាមលទ្ធភាពដែលខ្លួនអាចធ្វើបាន។ សម្រាប់យុវជន ស ស យ ក និង យុវជនកាកបាទក្រហមកម្ពុជា បានចូលរួមក្នុងបេសកកម្ម តាមការជួយជញ្ជូនរបស់របររបស់ជនរងគ្រោះឡើងមកលើគោកឱ្យមានសុវត្ថិភាព។ រីឯវត្តមានរបស់យុវជនមួយក្រុមទៀត បានចូលរួមតាមរយៈការផ្ដល់ជូននូវអាហារសម្រន់ និងភេសជ្ជៈជូនដល់កងកម្លាំងដោយមិនគិតថ្លៃ សម្រាប់ជាការលើកទឹកចិត្តចំពោះការព្យាយាម និងការលះបង់ទាំងកម្លាំងកាយចិត្តរបស់កងកម្លាំង ក្នុងការជួយសង្គ្រោះប្រជាពលរដ្ឋរងគ្រោះ។
ជុំវិញបញ្ហាទឹកជំនន់ដែលវាយប្រហារមកលើកម្ពុជានេះ បានបង្កផលប៉ះពាល់ជាច្រើន ហើយក៏បានបង្កឱ្យប្រជាពលរដ្ឋចំនួន ២៥នាក់បាត់បង់ជីវិតផងដែរ នេះបើតាមរបាយការណ៍របស់ គណៈកម្មាធិការជាតិគ្រប់គ្រងគ្រោះមហន្តរាយគិតត្រឹមថ្ងៃទី ១៩ តុលាម្សិលម៉ិញ។ របាយការណ៍ដដែលបញ្ជាក់ថា ទឹកជំនន់បានប៉ះពាល់ដល់១៩ រាជធានី ខេត្តស្មើនឹង ៩១ ក្រុង ស្រុក ខណ្ឌ និងប៉ះពាល់ដល់ប្រជាជនជិត ៨ម៉ឺនគ្រួសារ និងធ្វើឱ្យស្រូវលិចទឹកប្រមាណជាង ២សែនហិកតា និងលិចដំណាំរួមផ្សំប្រមាណជិត ៨ម៉ឺនហិកតា។ លើសពីនេះ ក៏បានប៉ះពាល់ដល់ផ្លូវជាតិ ផ្លូវខេត្ត ផ្លូវគ្រួសក្រហមជិត ៤០០ គីឡូម៉ែត្រផងដែរ។
សម្រាប់បញ្ហាអាកាសធាតុវិញ ក្រសួងធនធានទឹក និងឧតុនិយម បានចេញសេចក្ដីជូនដំណឹងនាព្រឹកនេះថា កម្ពុជាបាននឹងកំពុងទទួលខ្យល់មូសុងនិរតីកម្រិតមធ្យម ប្រព័ន្ធសម្ពាធទាបបន្តអូសបន្លាយកាត់ពីលើ។ លើសពីនេះ កម្ពុជាក៏អាចរងឥទ្ធិពលតិចតួចពីព្យុះទី ១៧ឈ្មោះ សុដែល ដោយព្យុះនេះនឹងធ្វើដំណើរចូលភាគខាងជើងប្រទេសវៀតណាម ក្នុងកំឡុងថ្ងៃទី ២៥–២៦ តុលា។ បាតុភូតនេះ នឹងធ្វើឱ្យកម្ពុជាសម្រាប់បណ្ដាខេត្តនៅជាប់តំបន់វាលទំនាប មានភ្លៀងធ្លាក់រាយប៉ាយពីតិចទៅមធ្យម ធ្វើឱ្យបណ្ដាខេត្តជាប់ជួរភ្នំដងរែក និងខ្ពង់រាបឦសាន មានភ្លៀងធ្លាក់រាយប៉ាយពីតិចទៅមធ្យម និងធ្វើឱ្យតំបន់មាត់សមុទ្រអាចមានភ្លៀងធ្លាក់ពីតិចទៅបង្គួរ៕
អត្ថបទ ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
