រុស្ស៊ី ៖ ទីភ្នាក់ងារសារព័ត៌មានរុស្ស៊ី និងបណ្តាញផ្សព្វផ្សាយសង្គម បានរាយការណ៍ ថាមនុស្សរាប់រយនាក់ កាលពីថ្ងៃអាទិត្យ បានសម្រុកចូលអាកាសយានដ្ឋានសំខាន់ក្នុងតំបន់ដាហ្គេស្តាន (Dagestan) របស់ប្រទេសរុស្ស៊ី និងទៅកាន់កន្លែងចុះចតដើម្បីតវ៉ាចំពោះការមកដល់របស់យន្តហោះពីទីក្រុង Tel Aviv ប្រទេសអ៊ីស្រាអែល ។ កងកម្លាំងសន្តសុខរុស្ស៊ី បានបណ្ដេញក្រុមបាតុករគាំទ្រពលរដ្ឋប៉ាឡេស្ទីនពីអាកាសយានដ្ឋាននេះ។ 

ក្រុមអាជ្ញាធរសុខាភិបាលក្នុងតំបន់ខាងលើនេះបាននិយាយថា មនុស្សប្រហែល ២០ នាក់បានរងរបួស ក្នុងនោះមានពីរនាក់ស្ថិតក្នុងស្ថានភាពធ្ងន់ធ្ងរ។ ម៉ាខាចកាឡា (Makhachkala) គឺជាតំបន់មួយក្នុងចំណោមតំបន់ជាច្រើននៅក្នុងតំបន់ កូកាស (Caucasus) ភាគខាងជើង ជាទីជម្រករបស់សហគមន៍មូស្លីមដ៏ធំ។ក្រុមអាជ្ញាធរបានបិទអាកាសយានដ្ឋាននៅក្នុងទីក្រុង ម៉ាខាចកាឡា ជារដ្ឋធានីនៃតំបន់ដែលមានប្រជាជនមូស្លីមច្រើនជាងគេ ហើយនគរបាលបានប្រមូលផ្ដុំគ្នានៅកន្លែងនោះ។ 

សេចក្តីរាយការណ៍ព័ត៌មានរបស់រុស្ស៊ីបាននិយាយថា មនុស្សនៅក្នុងហ្វូងមនុស្សកំពុងស្រែកពាក្យស្លោកប្រឆាំងនឹងសាសនា ហើយព្យាយាមសម្រុកចូលក្នុងអាកាសយានដ្ឋាន Red Wings ដែលជាកម្មសិទ្ធិរបស់ក្រុមហ៊ុនអាកាសចរណ៍រុស្ស៊ី ។ 

វីដេអូនៅតាមប្រព័ន្ធផ្សព្វផ្សាយសង្គមបានបង្ហាញពីហ្វូងមនុស្សមួយចំនួននៅលើទីលានចុះចតដោយគ្រវីទង់ជាតិប៉ាឡេស្ទីន បាតុករប៉ុនប៉ងលើកក្រឡាប់រថយន្តនគរបាល និងខ្លះទៀតពិនិត្យមើលលិខិតឆ្លងដែនរបស់អ្នកដំណើរដែលបានមកដល់ ។  

នៅក្នុងសេចក្តីថ្លែងការណ៍មួយដែលបានចេញផ្សាយកាលពីយប់ថ្ងៃអាទិត្យ ការិយាល័យនាយករដ្ឋមន្ត្រី Benjamin Netanyahu បាននិយាយថា អ៊ីស្រាអែល រំពឹងថាក្រុមអាជ្ញាធរអនុវត្តច្បាប់របស់រុស្ស៊ី នឹងការពារសុវត្ថិភាពរបស់ពលរដ្ឋអ៊ីស្រាអែល និងជនជាតិជ្វីហ្វទាំងអស់នៅគ្រប់ទីកន្លែងដែលពួកគេអាចមាន និងចាត់វិធានការយ៉ាងម៉ឺងម៉ាត់ប្រឆាំងនឹងក្រុមធ្វើកុបកម្ម និងប្រឆាំងនឹងការញុះញង់ដ៏ព្រៃផ្សៃប្រឆាំងនឹងជនជាតិជ្វីហ្វ និងជនជាតិអ៊ីស្រាអែល។ការិយាល័យរបស់លោក Netanyahu បានបន្ថែមថា ឯកអគ្គរដ្ឋទូតអ៊ីស្រាអែលប្រចាំនៅប្រទេសរុស្ស៊ី កំពុងធ្វើការជាមួយប្រទេសរុស្ស៊ី ដើម្បីរក្សាសុវត្ថិភាពជនជាតិអ៊ីស្រាអែល និងជនជាតិជ្វីហ្វ៕