ប៉ាឡេស្ទីន ៖ ទីភ្នាក់ងារជនភៀសខ្លួនប៉ាឡេស្ទីន របស់អង្គការសហប្រជាជាតិ (UNRWA) បាននិយាយថា អ្នកស្រុកតំបន់ហ្កាហ្សា រាប់ពាន់នាក់ បានសម្រុកចូលទៅក្នុងឃ្លាំងរបស់អង្គការសហប្រជាជាតិ កាលពីថ្ងៃអាទិត្យ (២៩ តុលា) ដោយបានប្រមូលយកម្សៅសម្រាប់ធ្វើនំ ស្បៀងអាហារ និងរបស់របរសំខាន់ៗផ្សេងទៀត ដែលនោះជាសញ្ញាមួយបង្ហាញថា ពលរដ្ឋទាំងនោះបានឈានដល់ «ដំណាក់កាលគ្រប់គ្រងលែងបាន»។ 

ឃ្លាំងមួយក្នុងចំណោមឃ្លាំងជាច្រើន ដែលមានទីតាំងនៅភូមិ Deir al-Balah ភាគកណ្ដាលតំបន់ហ្កាហ្សា គឺជាទីដែលទីភ្នាក់ងារជនភៀសខ្លួនប៉ាឡេស្ទីន UNRWA រក្សាទុកជំនួយ ដែលដឹកជញ្ជូនមកដោយក្បួនរថយន្តមនុស្សធម៌ ឆ្លងកាត់ចូលទៅក្នុងតំបន់ហ្កាហ្សា ពីប្រទេសអេហ្ស៊ីប។

ទីភ្នាក់ងារជំនួយ និងការងាររបស់អង្គការសហប្រជាជាតិ សម្រាប់ជនភៀសខ្លួនប៉ាឡេស្ទីន នៅតំបន់ដើមបូព៌ា (UNRWA) បាននិយាយនៅក្នុងសេចក្តីថ្លែងការណ៍មួយថា «នេះគឺជាសញ្ញាដ៏គួរឱ្យព្រួយបារម្ភមួយ ដែលបង្ហាញថា សណ្តាប់ធ្នាប់ស៊ីវិលកំពុងចាប់ផ្តើមដួលរលំ បន្ទាប់ពីសង្គ្រាមរយៈពេលបីសប្តាហ៍ និងការឡោមព័ទ្ធយ៉ាងតឹងរ៉ឹងលើតំបន់ហ្កាហ្សា»។

ការផ្គត់ផ្គង់ជំនួយដល់តំបន់ហ្កាហ្សា បានជាប់គាំងចាប់តាំងពីអ៊ីស្រាអែល បានចាប់ផ្តើមទម្លាក់គ្រាប់បែកលើតំបន់ប៉ាឡេស្ទីន ដែលមានប្រជាជនរស់នៅយ៉ាងក្រាស់ក្រែលមួយនេះ ជាការឆ្លើយតបទៅនឹងការវាយប្រហារដ៏បង្ហូរឈាមដោយក្រុមសកម្មប្រយុទ្ធហាម៉ាស កាលពីថ្ងៃទី៧ ខែតុលា។ 

ទីភ្នាក់ងារជនភៀសខ្លួនប៉ាឡេស្ទីន UNRWA បាននិយាយថា សមត្ថភាពរបស់ខ្លួនក្នុងការជួយប្រជាជននៅតំបន់ហ្កាហ្សា បានជួបការលំបាកជាខ្លាំងដោយសារការវាយប្រហារតាមអាកាស ដែលបានសម្លាប់បុគ្គលិករបស់ខ្លួនរាប់សិបនាក់ និងបានរិតបន្តឹងលើការចល័តនៃការផ្គត់ផ្គង់ផងដែរ៕