អុីស្រាអែល ៖ អ្នកបញ្ចុះបញ្ចូលមួយក្រុមសម្រាប់ក្រុមគ្រួសាររបស់ចំណាប់ថ្នូរជនជាតិអ៊ីស្រាអែល ដែលត្រូវបានក្រុមហាម៉ាសចាប់យកទៅ បានសុំទទូចកាលពីថ្ងៃអាទិត្យទី២៩តុលា ថា សុវត្ថិភាពមនុស្សជាទីស្រឡាញ់របស់ពួកគេ គួរតែជាចំណុចអាទិភាពសម្រាប់រដ្ឋាភិបាលអ៊ីស្រាអែល ខណៈយោធាពង្រីកប្រតិបត្តិការវាយប្រហារថ្មើរជើងនៅក្នុងតំបន់ហ្កាហ្សា។នៅឯទីស្នាក់ការកណ្តាលនៃវេទិកាចំណាប់ខ្មាំង និងគ្រួសារដែលបាត់ខ្លួនក្នុងទីក្រុង Tel Aviv លោក ណូមអាឡុន (Noam Alon) វ័យ២៤ឆ្នាំ ជាមិត្តប្រុសរបស់នាង អ៊ីបា ហៃម៉ាន់ (Inbar Haiman) ដែលត្រូវបានចាប់ពង្រត់ពីកន្លែងប្រគុំតន្ត្រីមួយ បាននិយាយថា ការធានាសុវត្ថិភាពរបស់ចំណាប់ថ្នូរទាំងអស់និងការបំផ្លាញក្រុម Hamas គឺជាគោលដៅពីរផ្ទុយគ្នា ដែលមិនអាចសម្រេចបានរួមគ្នាទេ។   

បុគ្គលិកសង្គមកិច្ចអ្នកស្រី អាត់វ៉ា អាដា (Adva Adar) បានសម្តែងការព្រួយបារម្ភអំពីសុខភាពរបស់ជីដូន    វ័យ៥៨ឆ្នាំរបស់ខ្លួន ដែលត្រូវបានចាប់ពង្រត់រួមជាមួយបងប្អូនជីដូនមួយរបស់អ្នកស្រីឈ្មោះតាម័រអាដា (Tamir Adar)វ័យ៣៨ឆ្នាំ ដោយនិយាយថាជីដូនរបស់អ្នកស្រី មិនមានពេលរង់ចាំទេ គាត់ត្រូវការត្រឡប់មកផ្ទះវិញឥឡូវនេះ។     

លោក ឡៃអិន (Lion) និងអ្នកស្រីលី យ៉ានី (Lea Yanai) បាននិយាយថា ពួកគេបានបាត់បង់ទំនាក់ទំនងជាមួយប្អូនស្រីរបស់ពួកគេនាងម៉ូរ៉ានស្តេឡាយ៉ាណៃ(Moran Stela Yanai) ដែលត្រូវបានចាប់ធ្វើជាចំណាប់ថ្នូរនៅឯពិធីបុណ្យណូវ៉ា(Nova)ដោយនិយាយថា ពួកគេបានឃើញនាងលើកចុងក្រោយនៅក្នុងវីដេអូ TikTok ដែលកំពុងដេកនៅវាលស្រែ និងអង្វរសុំទុកជីវិតឲ្យនាង អមជុំវិញដោយក្រុមចាប់ជំរិតដែលកំពុងដាក់បណ្តាសាជាភាសាអារ៉ាប់។

សាច់ញាតិរបស់ចំណាប់ថ្នូរបានប្រមូលផ្តុំគ្នានៅខាងក្រៅផ្ទះរបស់ប្រធានាធិបតីអ៊ីស្រាអែលលោក អ៊ីសាកហ៊ើហ្សុក(Isaac Herzog) ក្នុងទីក្រុងហ្សរ៉ុសេឡឹម(Jerusalem)កាលពីថ្ងៃអាទិត្យ ដោយមានមនុស្សឈរបន្តគ្នា និងកាន់ខិតប័ណ្ណមានព័ត៌មាន និងរូបភាពនៃមនុស្សជាទីស្រលាញ់របស់ពួកគេដែលត្រូវបានចាប់យកទៅនោះ។ក្រុមហាម៉ាស បានចាប់ចំណាប់ថ្នូរជាង ២០០ នាក់ រួមទាំងកុមារ ចូលទៅតំបន់ហ្កាហ្សា អំឡុងពេលការវាយឆ្មក់ចូលទឹកដីអ៊ីស្រាអែល រហូតមកដល់ពេលនេះ ក្រុមហាម៉ាស បានដោះលែងមនុស្ស ៤ នាក់ ហើយបាននិយាយកាលពីថ្ងៃព្រហស្បតិ៍ថា ការទម្លាក់គ្រាប់បែករបស់អ៊ីស្រាអែលបានសម្លាប់មនុស្ស ៥០ នាក់ផ្សេងទៀត ជាការអះអាងដែលសារព័ត៌មាន Reuters មិនអាចផ្ទៀងផ្ទាត់បាន៕