ហ្កាហ្សា ៖ ប្រមុខអង្គការសហប្រជាជាតិលោក Antonio Guterres កាលពីថ្ងៃអាទិត្យ ទី២៩ខែតុលា បានអំពាវនាវឲ្យដោះលែងចំណាប់ថ្នូរជាបន្ទាន់នៅក្នុងតំបន់ហ្កាហ្សា និងបង្កើតបទឈប់បាញ់សម្រាប់បុព្វហេតុមនុស្សធម៌។  

ថ្លែងទៅកាន់ក្រុមអ្នកសារព័ត៌មាន អំឡុងទស្សនកិច្ចរបស់លោកទៅកាន់ទីក្រុងកាតាម៉ាន់ឌូ (Kathmandu)ប្រទេសនេប៉ាល់ លោក Guterres បាននិយាយថា លោកសូមអំពាវនាវជាថ្មី ឲ្យមានបទឈប់បាញ់មនុស្សធម៌ភ្លាមៗ ដោះលែងចំណាប់ថ្នូរដោយគ្មានលក្ខខណ្ឌ និងដឹកជញ្ជួនជំនួយមនុស្សធម៌សម្រាប់មនុស្សដែលត្រូវការជាចាំបាច់នៅក្នុងតំបន់ហ្កាហ្សា ។ 

ការផ្គត់ជំនួយចូលទៅដល់ក្នុងតំបន់ហ្កាហ្សាត្រូវបានជួបការលំបាក ចាប់តាំងពីអ៊ីស្រាអែល ចាប់ផ្ដើមទម្លាក់គ្រាប់បែកលើតំបន់ឡោមព័ទ្ធដែលមានជនជាតិប៉ាឡេស្ទីនជាច្រើនរស់នៅ ជាការឆ្លើយតបទៅនឹងការវាយប្រហារដ៏ឃោរឃៅពីសំណាក់ក្រុមហាម៉ាស កាលពីថ្ងៃទី៧ខែតុលា។ 

ក្រុមអាជ្ញាធរវេជ្ជសាស្ត្រ នៅក្នុងតំបន់ហ្កាហ្សា ដែលមានប្រជាជន២លាន៣សែននាក់ បាននិយាយកាលពីថ្ងៃអាទិត្យថា មនុស្ស៨.០០៥នាក់ បានស្លាប់ រួមទាំងកុមារ៣.៣២៤នាក់ ត្រូវបានសម្លាប់ក្នុងជម្លោះរវាងអ៊ីស្រាអែលនិងក្រុមហាម៉ាស។ 

ចំនួនអ្នកស្លាប់សរុបនៃជម្លោះរវាងប៉ាឡេស្ទីន និងអ៊ីស្រាអែល ដែលនៅតែបន្ត បានកើនឡើងជាង ៩.០០០នាក់ នេះបើយោងតាមទិន្នន័យដែលចេញផ្សាយដោយក្រុមអាជ្ញាធរសុខាភិបាលរបស់ភាគីទាំងសងខាង។ ជម្លោះនៅតែបន្តកើនឡើង ខណៈភាគីទាំងពីរបានអះអាងថា មានការប្រយុទ្ធគ្នាថ្មីៗនៅតំបន់ហ្កាហ្សា៕