ម៉ិកស៊ិក ៖ កាលពីថ្ងៃអាទិត្យ រដ្ឋាភិបាលម៉ិកស៊ិក បានបង្កើនកិច្ចប្រឹងប្រែងដើម្បីជួយដល់ទីក្រុង Acapulco តំបន់ឆ្នេរដែលរងការវាយប្រហារដោយសារព្យុះសង្ឃរា ខណៈចំនួនអ្នកស្លាប់និងបាត់ខ្លួនពីព្យុះសង្ឃរា បន្តកើនឡើងដល់ចំនួនខ្ពស់បំផុតក្នុងកំណត់ត្រា ដែលបានវាយបក់បោកមកលើរមណីយដ្ឋានឆ្នេរមួយនេះ។

ព្យុះសង្ឃរា Otis បានវាយបោកបក់មកលើទីក្រុង Acapulco ជាប្រភេទព្យុះទី៥កាលពីថ្ងៃពុធសប្តាហ៍កន្លងទៅនេះ ដោយបានបំផ្លាញលំនៅឋាន សណ្ឋាគារ និងអាជីវកម្មជាច្រើនកន្លែង ដែលមានល្បឿនខ្យល់២៦៦គីឡូម៉ែត្រក្នុងមួយម៉ោង ធ្វើឲ្យដួលរលំបណ្តាញអគ្គិសនី និងទូរគមនាគមន៍ បន្សល់ទុកឲ្យពលរដ្ឋជិត៩០០.០០០នាក់ គ្មានបណ្តាញទាក់ទងគ្នា។

ការចូលលួចបានកើតឡើង ខណៈស្បៀងអាហារ ទឹក និងប្រេងឥន្ធនៈ បានខ្វះខាត បន្ទាប់ពីមានការបំផ្លាញបណ្តាលមកពីព្យុះសង្ឃរា Otis ដែលរដ្ឋាភិបាល បាននិយាយកាលពីថ្ងៃអាទិត្យថា បានសម្លាប់មនុស្ស៤៨នាក់ និង៦នាក់នៅបាត់ខ្លួន។ 

ប្រធានាធិបតី លោក Andres Manuel Lopez Obrador បាននិយាយថា ភាគច្រើននៃគណៈរដ្ឋមន្ត្រីរបស់លោក បានត្រៀម ឬធ្វើដំណើរទៅកាន់ ទីក្រុង Acapulco ហើយលោកនឹងត្រឡប់ទៅទីនោះ ដើម្បីដឹកនាំកិច្ចប្រឹងប្រែងស្តារឡើងវិញ ខណៈទាហាន និងនគរបាលរាប់ពាន់នាក់បានទៅដល់ទីក្រុងនោះ។ 

ទន្ទឹមនឹងនេះ ពលរដ្ឋទីក្រុង Acapulco រាប់សិបនាក់ កាលពីថ្ងៃអាទិត្យ បានតម្រង់ជួរនៅខាងមុខរថយន្តដឹកទំនិញរបស់កងទ័ពម៉ិកស៊ិក រង់ចាំទទួលការផ្គត់ផ្គង់ស្បៀងអាហារ ខណៈពលរដ្ឋព្យាយាមដើម្បីទទួលបានប្រេងឥន្ធនៈ និងទឹក ក្នុងពេលមានការបំផ្លាញរាលដាល បង្កឡើងដោយព្យុះសង្ឃរា Otis។