អាមេរិក ៖ សហរដ្ឋអាមេរិក និងកូរ៉េខាងត្បូង បានចាប់ផ្តើមសមយុទ្ធដែនអាកាសដ៏ធំ នៅថ្ងៃចន្ទ (៣០ តុលា) នេះ ដោយមានការចូលរួមពីយន្តហោះចម្បាំងចំនួន ១៣០គ្រឿង មកពីប្រទេសទាំងពីរ ដើម្បីធ្វើប្រតិបត្តិការសង្គ្រាមនិមិត្តរយៈពេល ២៤ម៉ោង។ 

កងទ័ពអាកាសកូរ៉េខាងត្បូងបាននិយាយថា សមយុទ្ធប្រចាំឆ្នាំ ដែលមានឈ្មោះថា «ការប្រុងប្រយ័ត្នការពារ» នេះ នឹងដំណើរការរហូតដល់ថ្ងៃសុក្រ ដែលបង្ហាញពីប្រភេទយន្តហោះចម្បាំងបំបាំងកាយ F-35 ទាំងពីសហរដ្ឋអាមេរិក និងកូរ៉េខាងត្បូង ក្នុងចំណោមយន្តហោះដទៃទៀត។

សមយុទ្ធនេះ មានគោលបំណងធ្វើឱ្យប្រសើរឡើងនូវអន្តរប្រតិបត្តិការរវាងយោធាទាំងពីរ ដោយអនុវត្តបេសកកម្មតាមអាកាសសំខាន់ៗ ដូចជាសមយុទ្ធបាញ់គ្រាប់ពិតពីអាកាសទៅដី ប្រតិបត្តិការការពារប្រឆាំងដែនអាកាស និងការហ្វឹកហ្វឺនសង្គ្រោះបន្ទាន់ផ្សេងៗទៀត។

សមយុទ្ធនេះបានធ្វើឡើង ខណៈកូរ៉េខាងជើង បាននិងកំពុងបង្កើនកិច្ចសហប្រតិបត្តិការយោធាជាមួយរុស្ស៊ី នៅក្នុងអ្វីដែលសហរដ្ឋអាមេរិក និងសម្ព័ន្ធមិត្តអាស៊ីរបស់ខ្លួនបានថ្កោលទោស ដោយសារការខិតខំប្រឹងប្រែងរបស់ទីក្រុងព្យុងយ៉ាង ក្នុងការបង្កើនសមត្ថភាពយោធារបស់ខ្លួនជាថ្នូរនឹងការគាំទ្រសព្វាវុធដល់ទីក្រុងម៉ូស្គូ៕