ប្រធានផ្នែកអនាម័យរបស់ប្រទេសអ៊ុយក្រែន បាននិយាយកាលពីចុងសប្តាហ៍ថា សាលារៀននឹងត្រូវផ្លាស់ប្តូរទៅដំណើរការតាមអនឡាញ ដោយចាប់ផ្តើមពីថ្ងៃចន្ទ (៣០ តុលា) នេះ នៅក្នុងទីក្រុង វ៉ីននីសៀ (Vinnytsia) ភាគកណ្តាលរបស់ប្រទេសអ៊ុយក្រែន បន្ទាប់ពីការផ្ទុះឡើងនៃជំងឺរលាកថ្លើមប្រភេទ A ដែលបានបណ្ដាលឲ្យកុមារ និងមនុស្សពេញវ័យជាច្រើននាក់ ត្រូវបញ្ជូនទៅកាន់មន្ទីរពេទ្យ។

លោក Ihor Kuzin ប្រធានគ្រូពេទ្យអនាម័យនៃប្រទេសអ៊ុយក្រែន បានបង្ហោះសារនៅលើបណ្ដាញសង្គម Facebook កាលពីថ្ងៃសៅរ៍ថា «រឿងសំខាន់នៅពេលនេះ គឺត្រូវបង្កើតមជ្ឈមណ្ឌលនៃការផ្ទុះឡើងនៃជំងឺ និងមូលហេតុ ដើម្បីបញ្ឈប់ការរីករាលដាលនៃមេរោគរលាកថ្លើមប្រភេទ A ក្នុងចំណោមប្រជាជនឱ្យបានឆាប់តាមដែលអាចធ្វើទៅបាន»។

យោងតាមមជ្ឈមណ្ឌលគ្រប់គ្រង និងការពារជំងឺ របស់សហរដ្ឋអាមេរិក បានឲ្យដឹងថា ជំងឺរលាកថ្លើមប្រភេទ A គឺជាការឆ្លងមេរោគថ្លើមរយៈពេលខ្លី ដែលអាចឆ្លងតាមរយៈការប៉ះពាល់ផ្ទាល់ ឬបរិភោគអាហារ ឬភេសជ្ជៈដែលមានមេរោគ។

សូមបញ្ជាក់ថា អ្នកដែលមានជំងឺរលាកថ្លើមប្រភេទ A អាចមានអារម្មណ៍មិនស្រួលខ្លួនពីរយៈពេលពីរបីសប្តាហ៍ទៅច្រើនខែ ប៉ុន្តែជាធម្មតាពួកគេនឹងជាសះស្បើយពេញលេញ លុះត្រាតែអ្នកឆ្លងជំងឺទាំងនោះស្ថិតក្នុងក្រុមមានហានិភ័យខ្ពស់ ឬមានស្ថានភាពសុខភាពពីមុន៕