ក្រសួងសុខាភិបាលប៉ាឡេស្ទីន បាននិយាយនៅថ្ងៃចន្ទនេះថា អ៊ីស្រាអែល បានបើកការវាយឆ្មក់លើទីក្រុងភាគខាងជើង Jenin ស្ថិតក្នុងតំបន់វ៉េសប៊ែង បណ្តាលឲ្យជនប៉ាឡេស្ទីន ៤នាក់ស្លាប់ និងមនុស្សរាប់សិបនាក់ផ្សេងទៀត រងរបួស ។

ក្រុមយុវជនប៉ាឡេស្ទីន ត្រូវបានគេមើលឃើញចោលដុំថ្មលើគ្រឿងចក្រអ៊ីស្រាអែល ដែលបានបើកឆ្លងកាត់ផ្លូវ ខណៈសំឡេងផ្ទុះគ្រាប់ និងការផ្ទុះអាវុធ បានឮពីចម្ងាយ ។ ចំណែកឯក្រុមគ្រូពេទ្យបឋម បានជួយជម្លៀសគ្រួសារទៅកាន់តំបន់សុវត្ថិភាពផងដែរ ។

អំពើហិង្សានៅក្នុងដែនដីមួយនេះ បានហក់ឡើងខ្ពស់ ចាប់តាំងពីអ៊ីស្រាអែល ចាប់ផ្តើមទម្លាក់គ្រាប់បែកលើតំបន់ហ្គាហ្សាស្រ្ទីប ក្រោយក្រុមជីវពលហាម៉ាស់ វាយប្រហារលើតំបន់ភាគខាងត្បូងអ៊ីស្រាអែលកាលពីថ្ងៃទី ៧ ខែតុលា ដោយបានសម្លាប់មនុស្សជាង ១.៤០០នាក់ ។

ស្របពេលដែលកើតមានក្តីកង្វល់ថា សង្រ្គាមអ៊ីស្រាអែល-ក្រុមហាម៉ាស់ អាចរីករាលដល់ជម្លោះក្នុងតំបន់ រដ្ឋមន្រ្តីក្រសួងការពារជាតិអ៊ីស្រាអែលលោក Yoav Gallant និយាយប្រាប់ក្រុមអ្នកសារព័ត៌មានថា អ៊ីស្រាអែល គ្មានចំណាប់អារម្មណ៍ធ្វើសង្រ្គាមក្រៅពីនៅតំបន់ហ្គាហ្សានោះទេ ប៉ុន្តែពួកយើងបានត្រៀមខ្លួនរួចរាល់នៅតាមខ្សែត្រៀមមុខទាំងអស់ ៕