អាស៊ាន៖ សមាគមប្រជាជាតិអាស៊ីអាគ្នេយ៍ហៅកាត់ថា ASEAN បានស្នើសុំប្រទេសចិនឱ្យជួយក្នុងកិច្ចខិតខំប្រឹងប្រែងរបស់ខ្លួន សម្រាលស្ថានការណ៍នៅក្នុងសហភាពមីយ៉ាន់ម៉ា។ រដ្ឋមន្ត្រីការបរទេសនៃប្រទេសសមាជិកអាស៊ាន និងចិនបានជួបប្រជុំគ្នានៅទីក្រុងឆុងឈីងប្រទេសចិន។
លោក Wunna Maung Lwin ជារដ្ឋមន្ត្រីក្រសួងការបរទេស ដែលត្រូវបានតែងតាំងដោយយោធាមីយ៉ាន់ម៉ា បន្ទាប់ពីរដ្ឋប្រហារក៏បានចូលរួមដែរ។ ក្រសួងការបរទេសឥណ្ឌូនេស៊ីបាននិយាយថា ពួកគេបានពិភាក្សាលើការឯកភាពគ្នា ៥ចំណុចដែលបានព្រមព្រៀងគ្នា នៅឯកិច្ចប្រជុំកំពូលអាស៊ានកាលពីខែមេសា។ កិច្ចព្រមព្រៀងនេះអំពាវនាវឱ្យបញ្ឈប់អំពើហិង្សា នៅក្នុងប្រទេសមីយ៉ាន់ម៉ាជាបន្ទាន់ និងប្រេសិតម្នាក់នឹងត្រូវបញ្ជូនទៅសម្របសម្រួលការចរចារវាងយោធា និងក្រុមគាំទ្រលទ្ធិប្រជាធិបតេយ្យ។
រដ្ឋមន្ត្រីការបរទេសឥណ្ឌូនេស៊ីលោកស្រី Retno Marsudi ក្រោយមកបានប្រាប់អ្នកសារព័ត៌មានថា វាជាកាតព្វកិច្ចរបស់អាស៊ាន ក្នុងការអនុវត្តកិច្ចព្រមព្រៀងនេះជាបន្ទាន់។ អ្នកនាំពាក្យក្រសួងការបរទេសចិនបាននិយាយថា ទីក្រុងប៉េកាំងនឹងរក្សាការប្រាស្រ័យទាក់ទងយ៉ាងជិតស្និទ្ធជាមួយអាស៊ាន និងគាំទ្រដល់កិច្ចខិតខំប្រឹងប្រែង ទទួលបានការសម្របសម្រួលរបស់ខ្លួនដើម្បីធានាបាននូវ “ស្ថានភាពធូរស្រាលយ៉ាងឆាប់រហ័ស” សម្រាប់សហភាពមីយ៉ាន់ម៉ា៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
