ក្រុមហេបូឡានៅប្រទេសលីបង់ បាននិយាយកាលពីថ្ងៃអាទិត្យថា ខ្លួនបានបាញ់ទម្លាក់យានដ្រូនអ៊ីស្រាអែលពីលើប្រទេសលីបង់ភាគខាងត្បូងជាមួយនឹងមីស៊ីលបាញ់ពីផ្ទៃរាបទៅលើអាកាស ជាលើកដំបូងដែលខ្លួនបានប្រកាសអំពីឧបទ្ទវហេតុបែបនេះ ខណៈដែលការប៉ះទង្គិចនៅព្រំដែនលីបង់ កាន់តែកើនឡើង។

ក្រុមហេសបូឡា បានបន្ថែមថា យានដ្រូននោះ ត្រូវបានវាយប្រហារនៅជិតទីក្រុង Khiam មានចម្ងាយប្រហែល៥ គីឡូម៉ែត្រ (៣ម៉ាយ) ពីព្រំដែនជាមួយអ៊ីស្រាអែល ហើយត្រូវបានគេឃើញធ្លាក់ក្នុងទឹកដីអ៊ីស្រាអែល។ ប្រភពសន្តិសុខចំនួនពីរនៅក្នុងប្រទេសលីបង់ បាននិយាយថា វាគឺជាលើកទីមួយហើយដែលក្រុមហេសបូឡា បានប្រកាសពីការបាញ់ទម្លាក់យានដ្រូនរបស់អ៊ីស្រាអែល។

ក្រសួងការពារជាតិអ៊ីស្រាអែល មិនបានផ្តល់ការអត្ថាធិប្បាយទេ។ យោធាអ៊ីស្រាអែលដែលបានអះអាងថាមានការវាយប្រហារបន្ថែមទៀតលើអ្វីដែលខ្លួនពណ៌នាថា ជាគោលដៅរបស់ក្រុមហេសបូឡា កាលពីថ្ងៃអាទិត្យ ក៏មិនបានធ្វើអត្ថាធិប្បាយដែរ។

លោក Mohanad Hage Ali មកពីមជ្ឈមណ្ឌលស្រាជ្រាវ Carnegie Middle East Center បាននិយាយថា ក្រុមហេសបូឡា បានបញ្ចាក់ថា ពួកគេមានសមត្ថភាពនេះ ប៉ុន្តែវាគឺជាលើកទីមួយហើយ ដែលពួកគេបានប្រកាសថា ពួកគេមានសមត្ថភាពប្រភេទនេះក្នុងការបាញ់ទម្លាក់យានដ្រូន។