​

ក្រុមបាតុកររាប់សែននាក់ បានប្រមូលផ្តុំគ្នានៅក្នុងទីក្រុងនានា នៅអឺរ៉ុប មជ្ឈិមបូព៌ា និងនៅអាស៊ី ដើម្បីបង្ហាញការគាំទ្រពលរដ្ឋប៉ាឡេស្ទីន ខណៈយោធាអ៊ីស្រាអែល បានពង្រីកការវាយលុកលើដីគោក និងតាមអាកាសទៅលើតំបន់ហ្កាហ្សា។ នៅក្នុងបាតុកម្មដ៏ធំបំផុតមួយ នៅក្នុងទីក្រុងឡុងដ្រ វីដេអូពីលើអាកាស បានបង្ហាញហ្វូងមនុស្សដ៏ច្រើនកំពុងដើរក្បួនឆ្លងកាត់កណ្តាលរដ្ឋធានីដើម្បីទាមទារ ឲ្យរដ្ឋាភិបាលរបស់នាយករដ្ឋមន្ត្រី លោក Rishi Sunak អំពាវនាវឲ្យមានបទឈប់បាញ់។ អ្នកតវ៉ានិយាយថា ប្រទេសមហាអំណាចធំៗ ដែលមានតួនាទី ពុំបានធ្វើអ្វីឲ្យគ្រប់គ្រាន់ឡើយនៅពេលនេះ។ នេះមិននិយាយអំពីក្រុមហាម៉ាស់នោះទេ នេះគឺនិយាយអំពីការការពារជីវិតរស់នៅរបស់ពលរដ្ឋប៉ាឡេស្ទីន។ ដោយគាំទ្រជំហររបស់ទីក្រុងវ៉ាស៊ីនតោន រដ្ឋាភិបាលរបស់លោក Sunak បានបញ្ឈប់ភ្លាមៗការអំពាវនាវសម្រាប់បទឈប់បាញ់ និងជំនួយដោយការផ្អាកការប្រយុទ្ធសម្រាប់ផ្នែកមនុស្សធម៌ ដើម្បីអនុញ្ញាតឲ្យជំនួយបានទៅដល់ពលរដ្ឋនៅក្នុងតំបន់ហ្កាហ្សា។ នៅក្នុងប្រទេសម៉ាឡេស៊ី ហ្វូងបាតុករដ៏ច្រើន បានស្រែកពាក្យផ្សេងៗនៅខាងក្រៅស្ថានទូតសហរដ្ឋអាមេរិក ក្នុងទីក្រុងកូឡាឡំពួ។ ជាមួយគ្នានេះ ក្នុងសុន្ទរកថា ទៅកាន់ក្រុមអ្នកគាំទ្ររាប់ម៉ឺននាក់ នៅក្នុងការជួបជុំគ្នាដ៏ធំនៅក្នុងទីក្រុងអ៊ីស្តង់ប៊ុល ប្រធានាធិបតីទួរគី លោក Tayyip Erdogan បាននិយាយថាអ៊ីស្រាអែលគឺជាអ្នកចូលកាន់កាប់ និងបានប្រកាន់ជំហរដដែលៗអំពីក្រុមហាម៉ាស់ ថាពុំមែនជាអង្គការភេរវកម្មនោះទេ។ ពលរដ្ឋអ៊ីរ៉ាក់ បានចូលរួមនៅក្នុងការប្រមូលផ្តុំគ្នានៅក្នុងទីក្រុងបាដាត និងនៅក្នុងតំបន់ West bank ដែលកាន់កាប់ដោយអ៊ីស្រាអែល ខណៈក្រុមអ្នកតវ៉ាប៉ាឡេស្ទីន ក្នុងទីក្រុង Hebron បានអំពាវសម្រាប់ការធ្វើពហិការសកល នូវផលិតផលរបស់ប្រទេសអ៊ីស្រាអែល។

នៅរដ្ឋធានី Wellington ប្រទេសនូវ៉ែលហ្សេឡង់ មនុស្សរាប់ពាន់នាក់ បានកាន់ទង់ជាតិ ប៉ាឡេស្ទីន និងផ្ទាំងប្រកាសមានអំណានថា«សេរីភាពប៉ាឡេស្ទីន» ដែលបានបានដើរក្បួនទៅកាន់រដ្ឋសភា។