យោធាអ៊ីស្រាអែល បាននិយាយថា ទាហានម្នាក់ដែលត្រូវបានចាប់ជាចំណាប់ថ្នូរ នៅ​ក្នុង​តំបន់​រង​ការ​ឡោម​ព័ទ្ធហ្កាហ្សា ត្រូវបានរំដោះ ស្របពេលប្រតិបត្តិការថ្មើជើងនៅតែបន្ត ។   

នៅ​ក្នុង​សេចក្តីថ្លែងការណ៍ខ្លីមួយកាលពីថ្ងៃចន្ទ អាជ្ញាធរអ៊ីស្រាអែលបាននិយាយថា ទាហាន​ស្រី​ម្នាក់​ឈ្មោះ អូរី មេជីឌីស (Ori Megidish) ត្រូវបានដោះលែង ហើយមានសុខភាពល្អធម្មតាទេ។   

កង​ទ័ពបាននិយាយនៅក្នុងសេចក្តីថ្លែងការណ៍មួយថា កាលពីយប់មិញ ទាហានជានារីម្នាក់គឺនាង       អូរី មេជីឌីស ត្រូវបានដោះលែងក្នុងអំឡុងពេលប្រតិបត្តិការថ្មើរជើង បន្ទាប់ពីត្រូវបានចាប់ខ្លួន ដោយ​ក្រុមហាម៉ាស កាលពីថ្ងៃទី៧ ខែតុលា ។    

ទាហាន​រូបនេះ ត្រូវបានពិនិត្យតាមវេជ្ជសាស្រ្ត មានសុខភាព ហើយ​បាន​ជួប​ជុំ​ក្រុម​គ្រួសារ​របស់ខ្លួនវិញហើយ។     

នាយករដ្ឋមន្ត្រី​អ៊ីស្រាអែល Benjamin Netanyahu បានបញ្ចេញរូបថតដែលបង្ហាញពី នាង មេជីឌីស ជួបជុំជាមួយគ្រួសាររបស់នាង ប៉ុន្តែយោធា ពុំបាន​ផ្តល់​ព័ត៌មាន​លម្អិត​ទាក់​ទង​នឹង​កាលៈ​ទេសៈ នៃ​ការដោះលែងទាហាននារីនោះទេ។ ប៉ុន្មានថ្ងៃចុងក្រោយនេះ អ៊ីស្រាអែល​បាន​បង្កើន​ការ​វាយ​ឆ្មក់​ដោយថ្មើជើងនៅតំបន់ហ្កាហ្សា។

ការប្រកាសនេះ​បានធ្វើឡើងប៉ុន្មានម៉ោងបន្ទាប់ពីក្រុមហាម៉ាស ដែលជាក្រុមប្រដាប់​អាវុធ​ប៉ាឡេស្ទីន​ គ្រប់គ្រងតំបន់​ហ្កាហ្សា​បាន​បញ្ចេញ​វីដេអូ​ដែល​បង្ហាញ​ពី​ចំណាប់​ខ្មាំង​បី​នាក់​ដែល​នៅតែ​ជាប់​ជាឈ្លើយសឹកនៅក្នុងតំបន់ហ្កាហ្សានៅឡើយ ។ 

យោងតាមអាជ្ញាធរអ៊ីស្រាអែល មនុស្សជាង២៣០ នាក់ រួមទាំងទាហានអ៊ីស្រាអែល និងជនស៊ីវិល ព្រម​ទាំងជនបរទេស ត្រូវបានចាប់ធ្វើជាចំណាប់ថ្នូរក្នុងអំឡុងពេលនៃការវាយប្រហារថ្ងៃទី៧ ខែ​តុលា លើភាគខាងត្បូងអ៊ីស្រាអែលដោយក្រុមហាម៉ាស ៕