ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) កាលពីថ្ងៃចន្ទ បាន​ចោទ​ប្រកាន់​អ៊ុយ​ក្រែន​ លោកខាងលិច និង សហរដ្ឋអាមេរិក ពីបទបង្កកុបកម្មប្រឆាំងអ៊ីស្រាអែល នៅ​អាកាស​យាន​ដ្ឋាន​ម៉ាខាចកាឡា (Makhachkala) នៅទីក្រុង ដាចេស្តាន(Dagestan) កាលពីថ្ងៃចន្ទ ជា​ការ​ចោទ​ប្រកាន់​ដែលទីក្រុងវ៉ាស៊ីនតោន ហៅថាមិនសមហេតុផល។

កងកម្លាំងសន្តិសុខបានឃុំខ្លួនមនុស្សជាង ៨០ នាក់ ចាប់តាំងពីឧបទ្ទវហេតុនេះ ដែលបាន​មើល​ឃើញ​ក្រុម​កុបកម្ម​នៅ​ក្នុង​តំបន់​ដែល​ភាគ​ច្រើន​ជា​មូស្លីម​បាន​កាន់​កាប់​ផ្លូវរត់​កាល​ពី​ល្ងាច​ថ្ងៃ​អាទិត្យ​ក្នុង​​ការ​ប៉ុនប៉ងឡោមព័ទ្ធយន្តហោះដែលបានហោះពីអ៊ីស្រាអែលមកដល់ប្រទេសរុស្ស៊ី។  

លោកPutin បាននិយាយនៅក្នុងកិច្ចប្រជុំតាមទូរទស្សន៍ថា ព្រឹត្តិការណ៍​នៅ​អាកាស​យានដ្ឋាន​ម៉ាខាចកាឡា កាលពីយប់មិញ ត្រូវបានញុះញុងតាមរយៈបណ្តាញសង្គមមិនតិចទេ ពីអ៊ុយក្រែន ដោយ​ដៃ-ជើង របស់ទីភ្នាក់ងារសេវាកម្មពិសេសលោកខាងលិច។  

ថ្លែងទៅ​កាន់សមាជិកជាន់ខ្ពស់នៃក្រុមប្រឹក្សាសន្តិសុខរបស់លោក លោក Putin បាន​និយាយ​ថា​មានការប៉ុនប៉ង បង្កអស្ថិរភាពដល់សង្គមរុស្ស៊ី និងបាន​ចោទ​ប្រកាន់​សហរដ្ឋ​អាមេរិ​ក​ថា​បាន​សាប​ព្រួស​អស្ថិរភាពនៅមជ្ឈិមបូព៌ា។ 

លោកបានបន្ថែមថា ការអនុវត្តច្បាប់របស់រុស្ស៊ី ចាំបាច់ត្រូវចាត់វិធានការយ៉ាងម៉ឺងម៉ាត់ ទាន់​ពេល​វេលា​ និងច្បាស់លាស់ បន្ទាប់ពីមានកុបកម្ម ដើម្បីការពារ សុខដុមរមនាអន្តរសាសនា។

ការ​អត្ថាធិប្បាយរបស់លោកប្រធានាធិបតីរុស្ស៊ីរូបនេះ ធ្វើឡើង​បន្ទាប់​ពី​ក្រសួង​ការ​បរទេស​របស់​ទី​ក្រុង​មូស្គូ​បាន​ចោទ​ប្រកាន់​ទីក្រុង​គីវ​(Kyiv)​ពី​តួនាទី​ផ្ទាល់​ក្នុង​កុបកម្ម​នៅ​ទីក្រុងដា​ចេស្តាន​(Dagestan)៕