ក្រុមអ្នករៀបចំ និងមន្ត្រីបាននិយាយថា ក្បួនដំណើរក្រុមជនអន្តោប្រវេសន៍ដ៏ធំ រួមមាន​ពលរដ្ឋ​អាមេរិក​កណ្តាល និងជនជាតិវ៉េណេហ្ស៊ុយអេឡា បានចាកចេញពីប្រទេសម៉ិកស៊ិកភាគខាងត្បូង កាល​ពីថ្ងៃចន្ទឆ្ពោះទៅកាន់សហរដ្ឋអាមេរិក ខណៈទីក្រុងវ៉ាស៊ីនតោន រកវិធីដោះ​ស្រាយ​សម្ពាធ​បន្ត​ថ្មី នៅព្រំដែនភាគខាងត្បូងរបស់ខ្លួន។

មន្ត្រីនៅរដ្ឋ Chiapas ភាគខាងត្បូង បាននិយាយថាមនុស្សប្រមាណ៣.៥០០នាក់ បាន​ចាប់​ផ្តើម​ធ្វើ​ដំណើរ​ដោយ​ថ្មើរជើងពីទីក្រុង Tapachula ជិតព្រំដែនប្រទេស​កាតេ​ម៉ាឡា​ ខណៈ​អ្នករៀបចំ​ក្រុម​ជន​អន្តោប្រវេសន៍ម្នាក់ ឈ្មោះ Irineo Mujica បាននិយាយថា មានជន​អន្តោ​ប្រវេសន៍​ប្រមាណ ៥.០០០នាក់ នៅក្នុងក្បួនដំណើរនេះ។

ភាគច្រើននៃក្រុម​ចុងក្រោយនេះ មកពីប្រទេសគុយបា អែលសាវ៉ាឌ័រ កាតេម៉ាឡា ហៃទី ហុងឌុយរ៉ាស់ និងប្រទេសវ៉េណេហ្ស៊ុយអេឡា។

ដោយត្រូវបាន​តាម​អមដំណើរដោយមន្ត្រីការពារជនស៊ីវិល និងរថយន្តគិលានសង្គ្រោះ ជនអន្តោ​ប្រវេសន៍ បានធ្វើដំណើរតាមផ្លូវហាយវ៉េតំបន់ឆ្នេរ អំឡុងពេលថ្ងៃត្រង់ ដោយមាន​ផែនការ​ចំណាយ​ពេល​១​យប់ នៅក្នុងទីក្រុង Huehuetan ចម្ងាយប្រមាណ២៥គីឡូម៉ែត្រ ភាគខាង​ជើង​ពី​កន្លែង​ដែល​ពួក​គេបានចាប់ផ្តើមធ្វើដំណើរ។ លោក Mujica និយាយថា ជនអន្តោប្រវេសន៍ បាន​ជ្រើស​រើស​ដើម្បី​ចាកចេញពីទីក្រុង Tapachula ដោយសារតែ​ការ​ខក​ចិត្ត​អំពី​ការ​ដែល​មិន​អាច​ទទួល​បាន​ទិដ្ឋាការមនុស្សធម៌។

ជនអន្តោប្រវេសន៍ជាច្រើនកំពុងភៀសខ្លួនចេញពីភាពក្រីក្រ អស្ថិរភាពនយោបាយ នៅប្រទេស​កំណើត​របស់ពួកគេ ហើយនៅឆ្នាំនេះ​បា​ន​ឃើញ​ចំនួន​ជន​អន្តោ​ប្រវេសន៍​យ៉ាង​ច្រើន​កំពុង​ឆ្លង​កាត់​តំបន់​ Darien Gap តភ្ជាប់ប្រទេសប៉ាណាម៉ា និងប្រទេសកូឡំប៊ី។