ត្បូងឃ្មុំ៖ ដើម្បីកាត់បន្ថយការចំណាយ និងបង្ករភាពងាយស្រួលដល់ប្អូនៗសិស្សានុសិស្ស ដែល​ត្រូវ​ប្រឡង​សញ្ញាបត្រមធ្យមសិក្សាទុតិយភូមិ (បាក់ឌុប) ដែលនឹងប្រព្រឹត្តទៅនៅថ្ងៃទី០៦ ខែ​វិច្ឆិកា ឆ្នាំ២០២៣ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តត្បូងឃ្មុំ និង​លោកជំទាវ ម៉េង វ៉ាន់ដានីន បានប្រកាសផ្ដល់ជូនកន្លែងស្នាក់នៅ និងផ្ញើកង់​ម៉ូតូ​ដោយ​ឥត​គិតថ្លៃនៅទូទាំងខេត្ត នេះបើយោងតាមការបញ្ជាក់របស់លោក សេង ជ័យវុធ នាយក​រដ្ឋបាល​សាលា​ខេត្ត​ត្បូងឃ្មុំ ។

ទីតាំងដែលផ្ដល់ជូនការស្នាក់នៅដោយឥតគិតថ្លៃ សម្រាប់បេក្ខជនប្រឡងនោះរួមមាន ក្រុងសួង មាន​ដូចជា៖ នៅក្រុងសួង ១២ផ្ទះសំណាក់, ស្រុកត្បូងឃ្មុំ ២៤ផ្ទះសំណាក់ បន្ថែម​ពី​នេះ​ការ​ទទួល​ផ្ញើ​កង់ ម៉ូតូ ក៏មិនគិតថ្លៃដូចគ្នាផងដែរ។ ជាមួយគ្នានោះឯកឧត្តមបណ្ឌិត ក៏បាន​ណែនាំ​ដល់​អាជ្ញាធរ​ត្រូវ​ចុះទៅណែនាំ និងធ្វើកិច្ចសន្យាឲ្យផ្អាកដំណើរចំពោះអាជីវកម្មថតចំលង ដែលនៅ​ជិត​មណ្ឌល​ប្រឡង​រយៈពេល ២ថ្ងៃនៃការប្រឡង និងបានណែនាំដល់មន្ទីរសុខាភិបាល អាជ្ញាធរ​មាន​សមត្ថកិច្ច​ត្រូវ​ត្រៀមគ្រូពេទ្យ ថ្នាំសង្កូវ រថយន្តសង្រ្គោះបន្ទាន់ និងត្រៀម​កំលាំង​ការពារ​សុខ​សុវត្ថិភាព សណ្ដាប់ធ្នាប់នៅថ្ងៃប្រឡងឲ្យបានល្អប្រសើរ។

សូមជម្រាបថា នៅខេត្តត្បូងឃ្មុំឆ្នាំ២០២៣ មានមណ្ឌលប្រឡងចំនួន ០៩ មណ្ឌល ដោយ​ក្នុង​នោះ​ថ្នាក់​វិទ្យាសាស្រ្តមានចំនួន ០៣ មណ្ឌល និងថ្នាក់វិទ្យាសាស្រ្តសង្គមមានចំនួន០៦ មណ្ឌល និង​មានបន្ទប់ប្រឡងចំនួន ១៩៦ បន្ទប់ និងមានបេក្ខជនប្រឡងសរុបចំនួន ៥,៦៥៤នាក់ ស្រីចំនួន៣,១៧៤ នាក់។

អាណាព្យាបាល និងប្អូនៗសិស្សានុសិស្ស អាចទំណាក់ទំនងមក​មន្រ្តី​រៀបចំ​បាន​តាម​រយៈ​លេខ​ទូរស័ព្ទ​៖ ០១១ ២០០ ០៣៧ / ០៩០ ៧៩៧ ២៧៣ និងអាចទាក់ទងផ្ទាល់ទៅលោក សេង ជ័យវុធ នាយករដ្ឋបាល តាមរយៈលេខទូរស័ព្ទ ០៩៩ ៨៨២១៦៨៕