ក្រសួងប្រៃសណីយ៍ និងទូរគមនាគមន៍ ក្រសួងព័ត៌មាន និងក្រសួងទេសចរណ៍ បាន​ចុះហត្ថ​លេខាលើ​អនុស្សរណៈលើការយោគយល់ ស្តីពី កិច្ចសហ​ប្រតិបត្តិការ​ដាក់​ឱ្យ​ប្រើថ្នាល​ផ្ទៀង​ផ្ទាត់​ឯកសារ verify.gov.kh ការរៀបចំហេដ្ឋារចនាសម្ព័ន្ធ ការតភ្ជាប់អ៊ីនធឺណិត និងការ​រៀបចំ​វគ្គ​បណ្តុះ​​បណ្តាលជំនាញឌីជីថលជូនដល់មន្រ្តីរាជការ។

នាព្រឹកថ្ងៃទី៣១ ខែតុលា ឆ្នាំ២០២៣ នៅទីស្ដីការក្រសួងប្រៃសណីយ៍ និងទូរគមនាគមន៍ ឯក​ឧត្ដម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ ឯកឧត្តម នេត ភក្ត្រា រដ្ឋមន្ត្រីក្រសួងព័ត៌មាន និង​ឯក​ឧត្តម សុខ សូកេន រដ្ឋមន្ត្រីក្រសួងទេសចរណ៍ បានអញ្ជើញជាអធិបតី និងជា​ហត្ថលេខី​ក្នុង​ពិធី​ចុះហត្ថ​លេខាលើអនុស្សរណៈនៃការយោគយល់រវាងក្រសួងទាំង៣ ផ្តោតលើគោលបំណង៣ សំខាន់គឺ កិច្ចសហប្រតិបត្តិការដាក់ឱ្យប្រើថ្នាលផ្ទៀងផ្ទាត់ឯកសារ verify.gov.kh ការរៀបចំ​ហេដ្ឋា​រចនា​សម្ព័ន្ធ និងការតភ្ជាប់អ៊ិនធឺណិត និងការរៀបចំវគ្គ​បណ្តុះបណ្តាល​ជំនាញ​ឌីជីថល​ជូន​ដល់​មន្រ្តីរាជ​ការ​ក្រោមឱវាទក្រសួងព័ត៌មាន។

ផ្អែកតាមខ្លឹមសារអនុស្សរណៈនៃការយោគយល់ដែលត្រូវបានចុះហត្ថលេខានេះ ក្រសួងប្រៃសណីយ៍ និងទូរគមនាគមន៍ នឹងជួយគាំទ្រដល់ក្រសួងព័ត៌មាន និងក្រសួងទេសចរណ៍ ក្នុងការធ្វើបរិវត្ត​កម្ម​ឌីជីថលផ្ទៃក្នុង ស្របតាមគោលនយោបាយរដ្ឋាភិបាលឌីជីថលកម្ពុជា ២០២២-២០៣៥ និងបញ្ចកោណទី៥ នៃយុទ្ធសាស្ត្របញ្ចកោណ ដំណាក់កាលទី១ ជាអាទិ៍ ការដាក់ QR Code ស្តង់ដាលើឯកសាររបស់ក្រសួងទាំងពីរ ដែលអាចផ្ទៀងផ្ទាត់បានតាមថ្នាល verify.gov.kh។ ការរៀបចំបណ្តាញហេដ្ឋារចនាសម្ព័ន្ធ និងតភ្ជាប់អ៊ីនធឺណិត ស្រប​តាម​តម្រូវ​ការ​នៃ​ការ​ប្រើប្រាស់ជាក់ស្តែង។ ការកំណត់តម្រូវការនៃការប្រើប្រាស់កុំព្យូទ័រ ឬឧបករណ៍​ឌីជីថល​ជា​របស់​រដ្ឋ និងការប្រើប្រាស់សុសវែរដែលមានអាជ្ញាបណ្ណក្នុងការងារប្រចាំថ្ងៃ។ ការ​កំណត់​មុខ​សញ្ញា​មន្រ្តី​ជំនាញ​ដែលត្រូវទទួលការបណ្តុះបណ្តាល។ ការពិគ្រោះ​យោបល់រៀប​ចំផែន​ការ​សកម្មភាព​ការងារ​ក្នុង​ក្របខណ្ឌគណៈកម្មាធិការរដ្ឋាភិបាលឌីជីថល និងការគិតគូរ​អំពី​ប្រព័ន្ធ​បច្ចេក​វិទ្យា​ឌីជីថល​សម្រាប់ការងារប្រចាំថ្ងៃ។

ពិធីចុះហត្ថលេខានេះ គឺជាលើកទី៦ហើយ ដែល ក្រសួងប្រៃសណីយ៍ និងទូរគមនាគមន៍ បាន​រៀបចំពិធីចុះហត្ថលេខាលើអនុស្សរណៈ និងកិច្ច​ព្រម​ព្រៀង​ស្តីពី​កិច្ច​សហប្រតិបត្តិការ​ក្នុង​ការ​ដាក់​ឱ្យ​ប្រើថ្នាល​ផ្ទៀងផ្ទាត់ឯកសារ verify.gov.kh និងការធ្វើឌីជីថលូបនីយកម្មក្នុងក្រសួង ស្ថាប័នរដ្ឋ និង​គ្រឹះស្ថានឧត្តមសិក្សា។

សូមបញ្ជាក់ផងដែរថា ថ្នាលផ្ទៀងផ្ទាត់ឯកសារ verify.gov.kh គឺជាថ្នាលរបស់រាជរដ្ឋាភិបាល ដែល​អភិវឌ្ឍដោយ ក្រសួងប្រៃសណីយ៍ និងទូរគមនាគមន៍ និងត្រូវបាន​ដាក់​ឱ្យ​ប្រើ​ក្នុង​គោល​បំណង​លុប​បំបាត់ការក្លែងបន្លំឯកសារ ផ្តល់ភាពងាយស្រួលក្នុងការប្រើ និងផ្ទៀងផ្ទាត់​ភាព​ត្រឹម​ត្រូវ​នៃ​ឯកសារ ផ្តល់ទំនុកចិត្ត ចំណេញពេលវេលា និងកាត់បន្ថយចំណាយនានា ព្រមទាំង​ជំរុ​ញ​ការ​ធ្វើ​បរិវត្តកម្មឌីជីថល ស្របតាមឧត្តមានុវត្តជាអន្តរជាតិ។ ការផ្ទៀងផ្ទាត់ឯកសារនៅលើថ្នាល verify.gov.kh ត្រូវធ្វើឡើងតាមរយៈការដាក់បញ្ចូល QR Code ស្តង់ដា ដោយប្រើ​បច្ចេក​វិទ្យា​ប្លុក​ឆេន (Blockchain) ដែលមានសុវត្ថិភាពខ្ពស់នៅលើសន្លឹកនៃឯកសារនីមួយៗ។ ទន្ទឹមនឹងនេះ ការ​ប្រើ​ឯកសារដែលមានដាក់បញ្ចូល QR Code ស្តង់ដានេះ មិនតម្រូវ​ឱ្យ​មាន​ការ​ធ្វើ​នីត្យានុកូល​កម្ម លើឯកសារថតចម្លងក្នុងទម្រង់ជាក្រដាសឡើយ៕ អត្ថបទ៖ ប្រាក់ វ៉ាន់ដា