​បាល់ទាត់៖ ឥន្ទ្រី​ដែក​អាល្លឺម៉ង់​បាន​បំបាក់​ក្រុម​ឡេ​តូ​នី​ដោយ​លទ្ធផល​ធំធេង ៧-១ ក្នុង​ជំនួប​មិត្តភាព​អន្តរជាតិចុងក្រោយ​ មុន​ព្រឹត្តិការណ៍​បាល់ទាត់​ជើងឯក​ទ្វីប​អឺរ៉ុប Euro ២០២០ ឈាន​មកដល់​ចុង​សប្ដាហ៍​នេះ​។

​​ខ្សែប្រយុទ្ធ Bayern Munich ដែល​ត្រូវ​បាន​កោះ​ហៅ​ចូល​ក្រុម​ជំរើសជាតិ​អាល្លឺម៉ង់​សារជាថ្មី Thomas Muller រក​បាន ១គ្រាប់​ក្នុង​ការ​ប្រកួត​នេះ​ ដែល​ជា​គ្រាប់​ដំបូង​ក្នុង​រយៈពេល​ជាង ២​ឆ្នាំ​។ វគ្គ​ទី​១ អាល្លឺម៉ង់​រក​បាន​គ្រាប់​នាំមុខ​ដល់​ទៅ ៥-០ ដោយ​គ្រាប់​បាល់​របស់ Robin Gosen, Ilkay Gundogan, Thomas Muller, Serge Gnabry និងគ្រាប់​បាល់​ចូល​ទី​ខ្លួនឯង​របស់​ក្រុម​ឡេ​តូ​នី​។ ​វគ្គ​ទី​២ ខ្សែប្រយុទ្ធ Chelsea, Timo Werner និង Leroy Sane រក​បាន​ម្នាក់​ ១គ្រា​ប់​ទៀត​។

​​ប្រកួត​នេះ​ដែរ​ប្រធាន​ក្រុម​អ្នកចាំទី Manuel Neuer ក៏បាន​ក្លាយ​ជា​អ្នកចាំទី​ដំបូង​របស់​អាល្លឺម៉ង់ ​ដែល​បង្ហាញខ្លួន​អោយ​ក្រុម​ជំរើសជាតិ​បាន ១០០​ប្រកួត​។ ​ក្រុម​អាល្លឺម៉ង់​នឹង​បើក​ទំព័រ Euro ២០២០ របស់​ខ្លួន​ ដោយ​នឹង​ត្រូវ​ជួប​ជាមួយ​ក្រុម​ជើងឯក​ពិភពលោក​បារាំង​នៅ​ថ្ងៃ​ទី​១៥ ខែ​មិថុនា មុន​បន្ត​ជួប​ព័រទុយហ្កាល់ និង​ហុង​គ្រី​។​

​អត្ថបទ​៖​នាង សុភា​វុ​ធ