ខ្មោចនាវា Sierra Madre ដែលគេនិយាយថា ត្រូវបានចតទុកចោលដោយចេតនារបស់ប្រទេសហ្វីលីពីន ក្នុងឆ្នាំ១៩៩៩ កំពុងតែទ្រុឌទ្រោមទៅៗ ខណៈដែលការជួសជុល ពិបាកនឹងធ្វើទៅបាន ដោយសារតែមានសកម្មភាពបិទផ្លូវពីសំណាក់ទីក្រុងប៉េកាំង។

នាវានោះប្រហែលត្រូវបានចាត់ទុកថា ជាប្រភេទមូលដ្ឋានយោធា ដែលមិនទំនងទាល់តែសោះ។ អស់រយៈពេលជាង ២ទសវត្សរ៍មកហើយ ដែលនាវាសល់ពីសម័យសង្រ្គាមលោកលើកទី២ ឈ្មោះ BRP Sierra Madre បានចតចោលដោយចេតនា ក្នុងដែនទឹករាក់ និងដាច់ស្រយាលនៃសមុទ្រចិនខាងត្បូង ដែលមានជម្លោះយ៉ាងខ្លាំងក្លា ដោយមានដោតទង់ជាតិហ្វីលីពីន និងការពារការពង្រីកដែនទឹករបស់ចិន។

ប៉ុន្តែអនាគតរបស់នាវានេះ កាន់តែមានភាពមិនច្បាស់លាស់ ហើយវាបានក្លាយទៅជាបញ្ហាដ៏លេចធ្លោ ដែលកំពុងកើនឡើងនៅក្នុងដែនទឹក ដែលមានជម្លោះបំផុតមួយរបស់ពិភពលោក។ នាវា Sierra Madre ដែលបានចតទុកចោល នៅតំបន់ថ្មប៉ប្រះទឹក (Second Thomas Shoal) ក្នុងប្រជុំកោះ Spratly តាំងពីឆ្នាំ១៩៩៩ គឺជាខ្មោចនាវាយ៉ាងជាក់ស្ដែង។ ច្រែះបានស៊ីផ្នែកខាងៗ ហើយចោះរន្ធទម្លុះសំបករបស់នាវានេះ។ អ្នកជំនាញការពារជាតិចោទសួរថា តើវាអាចនៅយូរប៉ុណ្ណាទៀត ហើយហ្វីលីពីនប្រឈមនឹងការសម្រេចចិត្តដ៏លំបាកអំពីអ្វី ដែលត្រូវធ្វើនាពេលបន្ទាប់។ 

ហើយវាក៏បង្កឲ្យមានភាពមិនច្បាស់លាស់ដែរ សម្រាប់សហរដ្ឋអាមេរិក ដែលមានសន្ធិសញ្ញាការពារគ្នាទៅវិញទៅមកជាមួយទីក្រុងម៉ានីល ហើយចាត់ទុកសមុទ្រចិនខាងត្បូង ដែលជាផ្លូវដឹកជញ្ជូនដ៏មមាញឹកបំផុតមួយរបស់ពិភពលោក មានសារៈសំខាន់ជាយុទ្ធសាស្ត្រ។

ការប៉ុនប៉ងរបស់ហ្វីលីពីន ក្នុងការផ្តល់សម្ភារៈផ្គត់ផ្គង់ដល់កងម៉ារីនមួយក្តាប់តូច ដែលរស់នៅលើកប៉ាល់នោះ ត្រូវបានរារាំងម្តងហើយម្តងទៀត ដោយប្រទេសចិន ដែលបានទាមទារឲ្យមានការអូសនាវានោះចេញ។ ក្រុមអ្នកវិភាគនិយាយថា ទីក្រុងប៉េកាំងកំពុងរង់ចាំប្រកបដោយប្រសិទ្ធភាព ក្នុងការបានឃើញនាវានោះ ទ្រុឌទ្រោមបណ្ដើរៗ ដែលទុកឲ្យតំបន់នេះគ្មានអ្នកកាន់កាប់។

កាលពីថ្ងៃអាទិត្យចុងសប្ដាហ៍កន្លងមក នាវាហ្វីលីពីន និងចិនបានប៉ះទង្គិចគ្នាចំនួន ២ដង ខណៈដែលទីក្រុងម៉ានីល ព្យាយាមធ្វើបេសកកម្មផ្គត់ផ្គង់គ្រឿងសម្ភារៈដល់នាវានោះ ដែលជាការប្រឈមមុខដាក់គ្នាលើដែនសមុទ្រដ៏តានតឹងជាបន្តបន្ទាប់៕