អ្នកនាំពាក្យអង្គភាពប្រឆាំងភេរវកម្មរបស់ប្រទេសឥណ្ឌូនេស៊ី នៅថ្ងៃអង្គារ (ទី៣១ ខែតុលា) នេះ បាននិយាយថា អង្គភាពបានចាប់ខ្លួនជនសង្ស័យប្រដាប់អាវុធចំនួន ៥៩នាក់ ក្នុងនោះរួមទាំងអ្នកស្មោះត្រង់មួយចំនួននៃក្រុម Jamaah Ansharut Daulah (JAD) ដែលត្រូវបានបំផុសគំនិត ដោយរដ្ឋឥស្លាម ដោយសង្ស័យថា មានផែនការរំខានដល់ការបោះឆ្នោត នាពេលខាងមុខ។

ក្នុងចំណោមអ្នកដែលត្រូវបានចាប់ខ្លួននោះ ១៩នាក់ គឺមកពីបណ្តាញ Jemaah Islamiah (JI) ដែលមានទំនាក់ទំនងជាមួយក្រុមអាល់កៃដា (al Qaeda) ខណៈដែលជនសង្ស័យ ៤០នាក់ផ្សេងទៀត មកពីក្រុម JAD ដែលបានប្ដេជ្ញាមានភាពស្មោះត្រង់ជាមួយរដ្ឋអ៊ីស្លាម (IS) ។

លោក Aswin Siregar អ្នកនាំពាក្យនៃក្រុមការងារប្រឆាំងភេរវកម្ម Densus 88 បានប្រាប់ថា ក្រុមសកម្មប្រយុទ្ធ JAD ត្រូវបានគេសង្ស័យពីការរៀបចំផែនការវាយប្រហារ ដើម្បីបង្កភាពចលាចលដល់ការបោះឆ្នោតប្រធានាធិបតី និងសភា នៅថ្ងៃទី១៤ ខែកុម្ភៈ។

លោក Aswin បានប្រាប់សន្និសីទសារព័ត៌មានថា៖ «សម្រាប់ពួកគេ ការបោះឆ្នោត គឺជាអំពើអសីលធម៌ ហើយប្រឆាំងនឹងច្បាប់អ៊ីស្លាម»។ ដោយមិនបានប្រាប់លម្អិតបន្ថែមអំពីផែនការដែលសង្ស័យនោះ លោកបាននិយាយថា៖ «ពួកគេមានគម្រោងវាយប្រហារទីតាំងនគរបាល។ គម្រោងនេះទាក់ទងទៅនឹងគោលដៅចម្បងរបស់ពួកគេ ដែលត្រូវតែលុបបំបាត់ការបោះឆ្នោតឲ្យបាន» ។

លោក Aswin បាននិយាយថា ជនសង្ស័យទាំងនោះ ត្រូវបានចាប់ឃុំខ្លួន ក្នុងប្រតិបត្តិការ ចាប់ពីថ្ងៃទី២ ដល់ថ្ងៃទី២៨ ខែតុលា ហើយនគរបាលក៏បានរឹបអូសកាំភ្លើង និងសារធាតុគីមីមួយចំនួន សម្រាប់ផលិតជាគ្រាប់បែកផងដែរ។

សូមបញ្ជាក់ថា ឥណ្ឌូនេស៊ី គឺជាប្រទេសមូស្លីម ដែលមានប្រជាជនច្រើនជាងគេបំផុតលើពិភពលោក ហើយប្រទេសនេះ បានកើតមាននូវការវាយប្រហារ ដោយសកម្មប្រយុទ្ធជាបន្តបន្ទាប់ ក្នុងរយៈពេលប៉ុន្មានឆ្នាំនេះ បន្ទាប់ពីការវាយប្រហារថ្ងៃទី១១ ខែកញ្ញា ឆ្នាំ២០០១ លើសហរដ្ឋអាមេរិក ក្នុងនោះរួមទាំងការបំផ្លុះគ្រាប់បែកលើកោះបាលី ក្នុងឆ្នាំ២០០២ ផងដែរ ដែលបានសម្លាប់មនុស្សជាង ២០០នាក់ ដែលភាគច្រើននៃជនរងគ្រោះ ជាអ្នកទេសចរអូស្ត្រាលី៕