ប្រទេសកូរ៉េខាងជើង ពុំបានបង្ហាញសញ្ញានៃការបង្ហោះផ្កាយរណបឈ្លបយកការណ៍យោធានោះទេ ទោះបីជា បានប្រកាសពីផែនការដើម្បីធ្វើការប៉ុនប៉ងបង្ហោះលើកទីបីនៅក្នុងខែតុលាក៏ដោយ។ 

ទីក្រុងព្យុងយ៉ាង បានព្យាយាមបង្ហោះផ្កាយរណប Malligyong-1 របស់ខ្លួន បំពាក់រ៉ុក្កែតប្រភេទថ្មី Chollima-1 ពីស្ថានីយ៍បាញ់បង្ហោះផ្កាយរណប Sohae កាលពីខែឧសភា និងខែសីហា។ ប៉ុន្តែការប៉ុនប៉ងទាំងពីរលើកបានបរាជ័យដោយសារបញ្ហាភាពមិនប្រក្រតីនៃរ៉ុក្កែត។ ផែនការសម្រាប់ការបាញ់បង្ហោះលើកទី ៣ មិនត្រូវបានប្រកាសក្នុងស្រុកនោះទេ។ ប៉ុន្តែវាជារឿងមិនធម្មតាឡើយ សម្រាប់រដ្ឋបាលប្រទេសដែលផ្តល់តម្លៃដល់កេរ្តិ៍ឈ្មោះរបស់ខ្លួន ក្នុងការមិនអនុវត្តផែនការដែលខ្លួនបានជូនដំណឹងដល់ប្រទេសផ្សេងទៀត។

ប្រភពព័ត៌មានជាច្រើន បានប្រាប់ប្រព័ន្ធផ្សព្វផ្សាយ NHK ថាការចំណាយនៃការបង្ហោះ និងការព្រួយបារម្ភពីការបរាជ័យមួយផ្សេងទៀត អាចនឹងជំរុញឱ្យទីក្រុងព្យុងយ៉ាងធ្វើការត្រួតពិនិត្យ និងធ្វើឲ្យប្រសើរ បច្ចេកវិទ្យាកាន់តែលម្អិតថែមទៀត។ ទីភ្នាក់ងារសារព័ត៌មានយ៉ុនហាប់របស់កូរ៉េខាងត្បូង បានរាយការណ៍ថា ពុំមានសកម្មភាពសំខាន់ៗណាមួយត្រូវបានបញ្ជាក់នៅទីតាំងបាញ់បង្ហោះនោះទេ។ ទីភ្នាក់ងារនិយាយថា កូរ៉េខាងជើង អាចនឹងចំណាយពេលដើម្បីកំណត់មូលហេតុនៃការបរាជ័យ និងទទួលបានការគាំទ្រផ្នែកបច្ចេកវិទ្យាពីប្រទេសរុស្ស៊ី។

សារព័ត៌មានយ៉ុនហាប់ បានដកស្រង់សម្តីអ្នកជំនាញប្រទេសកូរ៉េខាងត្បូងថា ការផលិតផ្កាយរណបទី៣ ប្រហែលជាមិនទាន់ត្រូវបានបញ្ចប់នៅឡើយ បន្ទាប់ពីបានបាត់បង់ផ្កាយរណបពីរគ្រឿងកាលពីពេលមុន។ ទីក្រុងព្យុងយ៉ាង ត្រូវបានគេជឿថានឹងបន្តដំណើរការយ៉ាងប្រុងប្រយ័ត្ន ព្រោះថាការបរាជ័យលើកទីបីជាប់ៗគ្នា អាចប៉ះពាល់ដល់កេរ្តិ៍ឈ្មោះមេដឹកនាំកូរ៉េខាងជើង លោក Kim Jong Un។