ភ្នំពេញ ៖ នាយិកាទីភ្នាក់ងារអង្គការសហប្រជាជាតិដើម្បីប្រជា ជនប្រចាំនៅកម្ពុជាបានជំរុញឱ្យភាគីពាក់ព័ន្ធទាំងអស់ពិចារ ណាដំណើរការចុះឈ្មោះជាបន្ត សម្រាប់ស្ត្រីបម្រើការងារនៅសេវាកម្សាន្ត និងមានហានិភ័យខ្ពស់ចូលនៅក្នុងប្រព័ន្ធប័ណ្ណបេឡាជាតិរបបសន្តិសុខសង្គមនិងប័ណ្ណសមធម៌សុខាភិបាល ដើម្បីទទួលបានសេវាសុខភាពផ្លូវភេទ សុខ ភាពបន្តពូជ និងសុខភាពមាតា ប្រកបដោយគុណភាព រួមទាំងផែនការគ្រួសារផងដែរ។ខណះចូលរួមក្នុងសិក្ខាសាលាស្តីពី“ការចូលរួមគាំទ្រស្ត្រីបម្រើការក្នុងសេវាកម្សាន្តទេសចរណ៍នៃសេដ្ឋកិច្ចក្រៅប្រព័ន្ធទទួលបានរបបថែទាំសុខភាពតាមប្រព័ន្ធមូលនិធិសមធម៌សុខាភិបាល” ក្រោមអធិបតីភាពដ៏ខ្ពង់ខ្ពស់របស់ សម្តេចកិតិ្តសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាប្រធានសមាគមនារីកម្ពុជាដើម្បីសន្តិ ភាពនិងអភិវឌ្ឍន នាថ្ងៃទី៣១ ខែតុលា ឆ្នាំ២០២៣ នៅសណ្ឋាគារភ្នំពេញដោយមានសមាសភាពអ្នកចូលរួមមានចំនួន១៧០នាក់ ដែលជាថ្នាក់ដឹកនាំមកពីក្រសួងមន្ទីរនានា អាជ្ញាធររាជធានីភ្នំពេញ ទីភ្នាក់ងារអង្គការសហប្រជាជាតិប្រចាំប្រទេសកម្ពុជាអង្គការសមាគមជាតិ អន្តរជាតិ និងស្ត្រីធ្វើការក្នុងសេវាកម្សាន្ត លោកស្រី សាន់ដ្រា បឺនក្លាវ (San dra Berklau)នាយិកាទីភ្នាក់ងារអង្គការសហប្រជាជាតិដើម្បីប្រជាជនប្រចាំនៅកម្ពុជា(UNFPA) បានលើកឡើងថា ការធ្វើការរួមគ្នាពីគ្រប់ភាគីពាក់ពន្ធ័ នោះអាចជួយធានាថា គ្មានស្រ្តីណាម្នាក់ត្រូវបានគេទុកចោលឡើយ គឺកាន់តែនាំឲ្យស្ត្រីមានសិទ្ធិទទួលបានការថែទាំសេវាកម្ម និងព័ត៌មានស្មើៗគ្នា។លោកស្រីក៍បានសម្ដែងការកោតសរសើរ និងដឹងគុណដល់រាជរដ្ឋាភិបាលកម្ពុជា ចំពោះការដឹកនាំនិងការប្តេជ្ញាចិត្ត ក្នុងការធានាឱ្យមានបរិយាប័ន្នដល់ប្រជាជន ដែល ប្រឈមមុខខ្ពស់ទៅក្នុងគោលនយោបាយនិងកម្មវិធីគាំពារសង្គមរបស់ប្រទេស។ លោកស្រីបន្តថាការមានប័ណ្ណបេឡាជាតិរបបសន្តិសុខសង្គមនិងប័ណ្ណសមធម៌ សុខាភិ បាល និងការប្រើប្រាស់ប័ណ្ណទាំងនេះ ដើម្បីស្វែងរកសេវាថែទាំសុខភាពប្រកបដោយគុណភាព ជាពិសេសសេវាសុខភាពបន្តពូជផ្លូវភេទនិងសុខភាពមាតា រួមទាំងផែនការគ្រួសារ គឺជាគន្លឹះឆ្ពោះទៅរកការធានាសិទ្ធិនិងការទទួលបានសេវាប្រកប ដោយគុណភាពសម្រាប់ទាំងអស់គ្នា។ 

ថ្លែងក្នុងឱកាសនោះផងដែរ សម្តេចកិត្តិសង្គហបណ្ឌិត ម៉ែន សំអន បានមានប្រសាសន៍ថា សិក្ខាសាលានេះពិតជាមានសារសំខាន់ណាស់ គឺសមស្របទៅនឹងគោលបំណង និងកិច្ចខិតខំប្រឹងប្រែងរបស់រាជរដ្ឋាភិបាលដែលបាននឹងកំពុងយកចិត្តទុកដាក់ក្នុងការជួយដល់ប្រជាពលរដ្ឋទាំង អស់ ហើយតាមរយៈសិក្ខាសាលានេះនឹងពង្រឹងនិងពង្រីកកិច្ចសហការ ជាមួយស្ថាប័នដៃគូរពាក់ព័ន្ធទាំងអស់ ក្នុងការជម្រុញ និងធ្វើឱ្យកាន់តែមានភាពងាយស្រួលដល់ស្ត្រីបម្រើការ ក្នុងសេវាកម្សាន្តទេសចរណ៍នៃសេដ្ឋកិច្ចក្រៅប្រព័ន្ធក្នុងការទទួលបានប័ណ្ណមូលនិធិសមធម៌សុខាភិ បាល និងការប្រើប្រាស់សេវានៅតាមទីតាំងផ្តល់សេវាសុខា ភិបាលប្រកបដោយគុណភាព ប្រសិទ្ធិភាពនិងគ្មានការរើងអើង។

សូមបញ្ជាក់ថា ក្នុងយុទ្ធនាការផ្តល់ប័ណ្ណមូលនិធិសមធម៌សុខាភិបាល សមាគមនារីកម្ពុជាដើម្បីសន្តិភាពនិងអភិវឌ្ឍន៍បានសម្របសម្រួលជាមួយម្ចាស់គ្រឹះស្ថាន ដើម្បីបញ្ជូនបញ្ជីឈ្មោះទៅក្រសួងការងារនិងបណ្តុះបណ្តាលវិជ្ជាជីវៈ ឬឃុំសង្កាត់និងបានចូលរួមធ្វើការងារផ្ទាល់ជាមួយអាជ្ញាធរមូលដ្ឋានជាប់ជាប្រចាំ។ បច្ចុប្បន្ននៅរាជធានីភ្នំពេញ ខេត្តកណ្តាល ព្រៃវែងនិងព្រះសីហនុ មានស្ត្រីចំនួន ១,០៦៣ នាក់ បានចុះឈ្មោះស្នើសុំប័ណ្ណក្រីក្រ ក្នុងនោះ ៥៥៧នាក់ មានឯកសារត្រឹមត្រូវតាមលក្ខ័ណ្ឌនិងទទួលបានប័ណ្ណក្រីក្រចំនួន ១២៦នាក់ (ភ្នំពេញ ២៧នាក់) និងប័ណ្ណមូលនិធិសមធម៌សុខាភិបាលចំនួន៨៨៤នាក់ (ភ្នំពេញ៨៤៦នាក់)៕ អត្ថបទ ៖ ភារម្យ