ការចែកចាយស្បៀងអាហារ និងការផ្គត់ផ្គង់ផ្នែកវេជ្ជសាស្រ្ត កំពុងមានការធ្លាក់ចុះ នៅក្នុង​តំបន់ហ្កាហ្សា ដោយសារតែកង្វះខាតប្រេងឥន្ធនៈរ៉ាំរ៉ៃ ការលួចឥវ៉ាន់ពីហាងលក់ទំនិញ បញ្ហា​កក​ស្ទះផ្លូវ​ដោយ​កម្ទេច​ថ្ម​ពីការបាញ់ផ្លោងរបស់អ៊ីស្រាអែល និងភាពណែនចង្អៀត ដែលបណ្តាល​មក​ពី​ការផ្លាស់ទីលំនៅរបស់ជនស៊ីវិលដ៏ច្រើនលើសលប់។

​ទោះបីជាមានការកើនឡើង នៃការផ្គត់ផ្គង់ក៏ដោយ ក៏ចំនួន​រថយន្ត​ជំនួយ​ដែល​ចូល​ទៅ​តំបន់​ហ្កាហ្សា នៅតែ​មានតិចតួចប៉ុណ្ណោះ ដោយជាជាមធ្យមមានចាប់ពី ១៤គ្រឿងជាប្រចាំថ្ងៃ បើ​ប្រៀប​ធៀប​ទៅ​នឹងរថយន្តដឹកទំនិញចំនួន ៤០០គ្រឿង ដែលមើល​ឃើញ​ជារៀង​រាល់​ថ្ងៃក្នុ​ង​ពេល​វេលា​ធម្មតា​សម្រាប់​ប្រជាជនចំនួន ២,៣លាននាក់ ដែលឥឡូវនេះ​កំពុង​មាន​ភាព​អស់​សង្ឃឹម​ដោយ​សារ​កង្វះ​ខាតអាហារសំខាន់ៗដូចជានំប៉័ងជាដើម។

ទីភ្នាក់ងារជនភៀសខ្លួនប៉ាឡេស្ទីន (UNRWA) របស់អង្គការសហប្រជាជាតិ និយាយថា ការ​សម្រុក​ចូល​លួចយកស្បៀងអាហារពីក្រុមពលរដ្ឋហ្កាហ្សា ដែលរងភាពស្រេកឃ្លាន កាល​ពី​ថ្ងៃ​អាទិត្យ នៅឯឃ្លាំងស្ដុកជំនួយមួយក្នុងចំណោមឃ្លាំងចំនួនពីររបស់ខ្លួន បាន​ធ្វើ​ឱ្យ​ការងារ​របស់​ភ្នាក់ងារ​ជំនួយ​មានភាពស្មុគស្មាញក្នុងការធ្វើការ ចំណែកឯឃ្លាំងទីពីរនៅជិតច្រកព្រំដែនរ៉ាហ្វាហ្វ (Rafah) ជាមួយប្រទេសអេហ្ស៊ីប ក៏កាន់តែពិបាកក្នុងការប្រតិបត្តិការផងដែរ ពីព្រោះ​ជន​ភៀស​ខ្លួន​ចំនួន ៨.០០០នាក់កំពុងស្នាក់នៅទីនោះ។

ការវាយ​ប្រហារកាលពីថ្ងៃទី៧ តុលា ដោយក្រុមសកម្មប្រយុទ្ធប៉ាឡេស្ទីនហាម៉ាស រួម​ទាំង​ការ​វាយ​បក​សង​សឹករបស់អ៊ីស្រាអែល លើតំបន់ហ្កាហ្សា បានធ្វើឲ្យមានមនុស្សស្លាប់រាប់ពាន់នាក់ សម្រាប់​ភាគី​ទាំង​សងខាង ហើយក៏បានធ្វើឲ្យមនុស្សរាប់លាននាក់ ផ្លាស់ទីលំនៅផងដែរ៕