អនុរដ្ឋមន្រ្តីការបរទេសទី១ នៃសាធារណរដ្ឋកូរ៉េខាងត្បូង លោក ចាង ហួរ ជីន ( Chang Ho-jin) បានថ្លែងអះអាងថា រដ្ឋាភិបាលកូរ៉េបានចាត់ទុកកម្ពុជា បាន​ក្លាយ​ទៅ​ជាដៃគូ​សហប្រតិបត្តិការ​អភិវឌ្ឍន៍​ដ៏​ធំបំផុតរបស់ខ្លួនសម្រាប់ឆ្នាំនេះ ហើយលោក​បាន​កោត​សរសើរ​ផង​ដែរ​ចំពោះ​ការ​ផ្លាស់​ប្តូរ​យ៉ាង​ឆាប់រហ័សរបស់កម្ពុជា រួមជាមួយនៃការកើនឡើងនូវចំនួនអគារខ្ពស់ៗជាច្រើននោះ។

ការលើកឡើងរបស់អនុរដ្ឋមន្រ្តីទី១ ការបរទេសកូរ៉េនេះ គឺបានធ្វើឡើងនៅក្នុងកិច្ចជំនួប ជាមួយ​ឯកឧត្តម សុខ ចិន្តាសោភា ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និង​សហប្រតិបត្តិការ​អន្តរជាតិ​កាលពីថ្ងៃទី៣១ ខែតុលា ឆ្នាំ២០២៣នេះ នៅទីស្តីការក្រសួងការបរទេស។

យោងតាមសេចក្តីប្រកាសព័ត៌មាន ស្តីពីលទ្ធផលនៃកិច្ចជំនួប បានបញ្ជាក់ថា ភាគីទាំងពីរ(កម្ពុជា- កូរ៉េ) បានសម្តែងនូវការពេញចិត្តយ៉ាងជ្រាលជ្រៅ ចំពោះការបញ្ចប់​ប្រកប​ដោយ​ជោគ​ជ័យ​នៃ​កិច្ច​ប្រជុំគណៈកម្មការចម្រុះកម្ពុជា-សាធារណរដ្ឋកូរ៉េ លើកទី៥នៅថ្ងៃទី៣១ ខែតុលា ឆ្នាំ២០២៣នេះ ដោយ​បានដាក់ចេញនូវទិសដៅសកម្មភាពថ្មី ដើម្បីបង្កើន និងធ្វើឲ្យស៊ីជម្រៅបន្ថែម​ទៀត​នូវ​កិច្ច​សហប្រតិបត្តិការ​គ្រប់វិស័យដែលផ្តល់ផលប្រយោជន៍ទៅវិញទៅមក។

តាមយរៈសេចក្តីប្រកាសនេះភាគីទាំងពីរ ក៏បានសង្កត់ធ្ងន់ពីតួនាទីសំខាន់នៃកិច្ចព្រមព្រៀងសេរី កម្ពុជា-កូរ៉េ កិច្ចព្រមព្រៀងស្តីពីការចៀសវាងការយកពន្ធត្រួតគ្នា ច្បាប់​ស្តីពី​ការ​វិនិយោគ​របស់​កម្ពុជា និងវេទិការាជរដ្ឋាភិបាល ផ្នែកឯកជនប្រចាំឆ្នាំ ហើយឯកឧត្តមសុខ ចិន្តាសោភា បាន​លើក​ឡើង​ពី​សក្តានុពល របស់យន្តការទាំងនោះ ក្នុងការជំរុញពាណិជ្ជកម្ម និង​ការ​វិនិយោគ​ទ្វេភាគី​បន្ថែម​ទៀត​ផងដែរ។

ថ្លែងនៅក្នុងកិច្ចជំនួបនោះលោក ចាង ហួរ ជីន បានលើកឡើងអំពីការផ្លាស់ប្តូរដ៏ឆាប់រហ័សរបស់ កម្ពុជា ហើយលោកសូមកោតសរសើរអំពីការកើនឡើងនៃចំនួនអគារខ្ពស់ ព្រមទាំង​កំណើន​ក្នុង​ស្រុក​ដ៏រឹងមាំ ដែលនេះគឺជាការឆ្លុះបញ្ចាំងពីការអភិវឌ្ឍដ៏គួរឲ្យកត់សម្គាល់របស់កម្ពុជា។

សេចក្តីប្រកាសព័ត៌មានដដែលនេះ ក៏បានលើកឡើងផងដែរថា នៅក្នុងកិច្ចជំនួបនោះភាគីទាំងពីរ ក៏បា​នពិភាក្សាអំពីវិធានការនានា ដើម្បី​លើក​កម្ពស់​ទំនាក់​ទំនង​ទ្វេភាគី​ឲ្យ​ឈាន​ដល់​កម្រិត​ថ្មី​មួយ​ទៀត​ ពន្លឿនការអនុវត្តគម្រោងស្ពានមិត្តភាពកម្ពុជា-សាធារណកូរ៉េ និង​លើក​ទឹកចិត្ត​ឲ្យ​ក្រុម​ហ៊ុន​កូរ៉េ​បន្ថែម​ទៀត មកបណ្តាក់ទុននៅកម្ពុជា ជាពិសេសវិស័យកសិកម្ម, ការកែច្នៃម្ហូបអាហារ, និង​ផលិត​កម្ម ព្រមទាំងសកម្ម ភាពផ្តល់តម្លៃបន្ថែមខ្ពស់ ដោយ​ផ្អែក​លើ​បច្ចេក​វិទ្យា​ទំនើប​របស់​កូរ៉េ​​ជា​ដើម​៕ អត្ថបទ៖ បាន ចក់