ប្រទេសមួយចំនួននៅអាមេរិកខាងត្បូង បានចុះកំណត់ទូតតវ៉ាប្រឆាំងនឹងអ៊ីស្រាអែល ដើម្បី​ឆ្លើយ​តប​ទៅ​នឹងជម្លោះចុងក្រោយរបស់ខ្លួនជាមួយក្រុមហាម៉ាស ដោយរដ្ឋាភិបាល​ឆ្វេង​និយម​របស់​ប្រទេស​បូលីវី បានកាត់ផ្តាច់ទំនាក់ទំនងទាំងស្រុង និងដោយសារ​ការ​សម្រេច​ចិត្ត​របស់​ខ្លួន​ចំពោះ​ឧក្រិដ្ឋកម្ម​សង្រ្គាម និងការរំលោភសិទ្ធិមនុស្ស ដែលត្រូវបានប្រព្រឹត្ត នៅក្នុងតំបន់ហ្កាហ្សាស្ទ្រីប។

ការ​សម្រេចរបស់ប្រទេសបូលីវី ត្រូវបានប្រកាសនៅក្នុងសន្និសីទសារព័ត៌មាន កាល​ពី​រសៀល​ថ្ងៃ​អង្គារ ដោយលោកស្រី María Nela Prada ដែលជារដ្ឋមន្ត្រីក្នុងរដ្ឋបាលរបស់ លោកប្រធានាធិបតី Luis Arce។ រដ្ឋមន្ត្រីរូបនេះ បានប្រាប់អ្នកយកព័ត៌មាននៅក្នុងរដ្ឋធានី La Paz របស់​ប្រទេស​លោកស្រីថា យើងទាមទារឲ្យបញ្ចប់ការវាយប្រហារលើតំបន់ហ្កាហ្សាស្ទ្រីប ដែល​រហូត​មក​ទល់​ពេល​នេះ បានសម្លាប់ជនស៊ីវិលរាប់ពាន់នាក់ និង​បណ្តាល​ឲ្យ​ប្រជាជន​ប៉ាឡេស្ទីន​ផ្លាស់​ទី​លំនៅ​ដោយ​បង្ខំ។

ប៉ុន្មាន​ម៉ោងក្រោយមក រដ្ឋាភិបាលនៃប្រទេសឈីលី និងកូឡុំប៊ី បានហៅ​ឯកអគ្គរដ្ឋទូត​របស់​ពួក​គេ​ត្រឡប់​មក​ពីអ៊ីស្រាអែល ខណៈដែលប្រធានាធិបតីប្រេស៊ីល បានរិះគន់​ការ​បន្ត​វាយ​ប្រហារ​តាម​អាកាស​លើ​តំបន់ហ្កាហ្សា។

អនុរដ្ឋ​មន្ត្រីការបរទេសរបស់ប្រទេសបូលីវី លោក Freddy Mamani Machaca បាននិយាយថា ការ​សម្រេចចិត្តនេះ គឺជា«ការបដិសេធ និងការថ្កោលទោសចំពោះការវាយលុកឈ្លានពាន និង​មិន​សម​ហេតុ​ផលរបស់យោធាអ៊ីស្រាអែល នៅតំបន់ហ្កាហ្សាស្ទ្រីប និងការគំរាមកំហែងដល់សន្តិភាព និង​សន្តិសុខអន្តរជាតិ»៕