ភ្នំពេញ៖ ដើម្បីឱ្យគម្រោងបានឆ្លុះបញ្ចាំងពីតម្រូវការជាអាទិភាពនៅថ្នាក់មូលដ្ឋាន ក៏ដូចជា​ប្រើ​ប្រាស់​ធនធានឱ្យចំគោលដៅ និងអនុវត្តទៅប្រកបដោយប្រសិទ្ធភាព រដ្ឋបាលខណ្ឌដូនពេញ​បាន​រៀបចំ​សិក្ខាសាលា សមាហរណកម្ម កម្មវិធីវិនិយោគបីឆ្នាំរំកិល ២០២៤ –២០២៦ ដើម្បី​អោយ​មន្ទីរ​ជំនាញ​ជុំវិញ​រដ្ឋបាលរាជធានីតំណាងដៃគូអភិវឌ្ឍន៍ សប្បុរសជន និងវិស័យឯកជន​បាន​ចូលរួម​។

កម្មវិធីនេះធ្វើឡើង នៅព្រឹកថ្ងៃទី ០១ ខែវិច្ឆិកា ឆ្នាំ២០២៣នេះ ក្រោមអធិបតីភាពលោក សុខ ពេញវុធ អភិបាលរងរាជធានីតំណាងដ៏ខ្ពង់ខ្ពស់ ឯកឧត្តម ឃួង ស្រេង អភិបាល នៃ​គណៈ​អភិបាល​រាជ​ធានី​ភ្នំពេញ លោក ជា ខេមា អភិបាលខណ្ឌដូនពេញ ក្រុមប្រឹក្សាខណ្ឌ មន្ទីរជំនាញ​ជុំវិញ​រដ្ឋបាល​រាជធានី តំណាងដៃគូអភិវឌ្ឍន៍ សប្បុរសជន និងវិស័យឯកជនផងដែរ។

លោក ជា ខេមា អភិបាលខណ្ឌដូនពេញ បានមាន​ប្រសាសន៍​លើក​ឡើង​ថា​ការ​រៀបចំ​សិក្ខា​សាលា​សមាហរណកម្ម កម្មវិធីវិនិយោគបីឆ្នាំរំកិល ២០២៤-២០២៦ របស់សង្កាត់ទាំង១១ របស់ខណ្ឌ នៅពេលនេះ មានគោលបំណង ដើម្បី​ផ្សព្វផ្សាយ​គម្រោង​វិនិយោគ​ជា​អាទិភាព​ឆ្នាំ​២០២៤​ របស់រដ្ឋបាលខណ្ឌ សង្កាត់ និងការ ស្នើសុំការគាំទ្រគម្រោង ពីមន្ទីរ អង្គភាពជំនាញ អង្គការ ដៃគូអភិវឌ្ឍន៍នានា វិស័យឯកជន និងសប្បុរសជន ដើម្បីគាំទ្រគម្រោងរបស់សង្កាត់ និង​ខណ្ឌ។ លោកបន្តថា ជារៀងរាល់ឆ្នាំ នៅតាមសាលាខណ្ឌនីមួយៗ តែងតែបាន រៀបចំ​សិក្ខា​សាលា​សមាហរណ​កម្ម កម្មវិធីវិនិយោគបីឆ្នាំរំកិលរបស់សង្កាត់ ខណ្ឌ តាមការណែនាំ​របស់​ថ្នាក់​ជាតិ ជា​រផងរាល់ឆ្នាំ។ សិក្ខាសាលានេះរៀបចំឡើង ស្របតាមផែនការអភិវឌ្ឍន៍ប្រាំឆ្នាំ ទាំង​របស់​សង្កាត់ និងខណ្ឌ ដែលនៅក្នុងនោះចាំបាច់ត្រូវមានការចូលរួមគាំទ្រពី មន្ទីរជំនាញ ដៃគូអភិវឌ្ឍន៍ សប្បុរសជន និងវិស័យឯកជន ដើម្បីឱ្យគម្រោងដែលបានរៀបចំ ឆ្លុះបញ្ចាំង​ពីត​ម្រូវ​ការ​ជា​អាទិភាព​នៅ​ថ្នាក់​មូលដ្ឋាន ប្រើប្រាស់ធនធានឱ្យចំគោលដៅ និងអនុវត្តទៅ​ប្រកប​ដោយ​ប្រសិទ្ធ​ភាព​។

លោក សុខ ពេញវុធ អភិបាលរងរាជធានីភ្នំពេញ បានលើកឡើងផងដែរថា សូម​កោត​សរសើរ និង​វាយ​តម្លៃ​ខ្ពស់ ចំពោះ លោក លោកស្រី តំណាងឱ្យមន្ទីរជំនាញ តំណាង​ឱ្យ​អង្គការ​ដៃគូរ​អភិវឌ្ឍ​នានា វិស័យឯកជន និង សប្បុរសជនទាំងអស់ ដែលបានជួយគាំទ្រដល់ ខណ្ឌដូនពេញ និង​សង្កាត់ទាំង១១ ក្នុងពេល កន្លងមក ហើយក៏សូមសំណូមពរឱ្យបន្តការគាំទ្រតទៅទៀត ដើម្បី​ចូល​រួម​អភិវឌ្ឍរាជធានីភ្នំពេញឱ្យកាន់តែរីកចំរើន ជាបន្តបន្ទាប់ ស្របតាម គោល​នយោបាយ​យុទ្ធសាស្ត្រ​បញ្ចកោណ​ដំណាក់កាលទី១ របស់រាជរដ្ឋាភិបាលកម្ពុជា ក្រោមការដឹកនាំ​ប្រកប​ដោយ​គតិ​បណ្ឌិត​របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃ ព្រះរា​ជា​ណា​ចក្រ​កម្ពុជា​។ លោកអភិបាលរងបានបញ្ជាក់បន្ថែមថា អង្គភាពជំនាញ​ពាក់ព័ន្ធ​នឹង​បន្ត​ការ​គាំទ្រ​ដល់គម្រោងសកម្មភាពកម្មវិធីវិនិយោគបីឆ្នាំរំកិលខណ្ឌ និងគម្រោង​សកម្មភាព​កម្ម​វិធី​វិនិយោគ​ជា​អាទិភាព​របស់សង្កាត់ជាបន្តទៀត ដើម្បីឆ្លើយតបទៅនឹងតម្រូវការរបស់ប្រជាពលរដ្ឋ ពិសេស​ការ​អភិវឌ្ឍ​នៅ​មូលដ្ឋាន។

សម្រាប់គម្រោងជាអាទិភាព ឆ្នាំ២០២៤ ដែលត្រូវ​ដាក់​ស្នើ​សុំការ​គាំទ្រ​នៅ​ក្នុង​សិក្ខា​សាលា​សមាហរណកម្ម​នាពេលនេះមានចំនួន ១១៨គម្រោង ដែលមានផ្នែកសេដ្ឋកិច្ច ២៤គម្រោង,  ផ្នែក​សង្គមកិច្ច ៦១គម្រោង, ផ្នែកគ្រប់គ្រងដីធ្លីធនធានធម្មជាតិបរិស្ថាន ១៣គម្រោង, ផ្នែក​សេវា​កម្ម​រដ្ឋបាល និងសន្តិសុខ២០គម្រោង៕ អត្ថបទ៖ កុម្ភៈ