ហ្ស៊កដានី ៖ សំណើរបស់ហ្ស៊កដានី សម្រាប់ប្រព័ន្ធការពារដែនអាកាស Patriot ពីទីក្រុងវ៉ាស៊ីនតោន បានឆ្លុះបញ្ចាំងពីការព្រួយបារម្ភកាន់តែខ្លាំងឡើងរបស់ខ្លួនអំពីការជាប់ពាក់ព័ន្ធក្នុងការបាញ់ប្រហារ ប្រសិនបើសង្រ្គាមនៅតំបន់ហ្កាហ្សា បានអូសទាញប្រទេសអ៊ីរ៉ង់ និងកងជីវពលប្រដាប់អាវុធក្នុងតំបន់ នៅតាមព្រំដែននៃព្រះរាជាណាចក្រនេះឲ្យចូលរួម។

ប្រទេសហ្ស៊កដានី ស្ថិតនៅជិតខាងប្រទេសស៊ីរី និងអ៊ីរ៉ាក់ ជាទីដែលកងកម្លាំងតំណាងរបស់អ៊ីរ៉ង់ កំពុងប្រតិបត្តិការ ហើយក៏ស្ថិតក្បែរអ៊ីស្រាអែល និងតំបន់ West Bank កាន់កាប់ដោយអ៊ីស្រាអែលផងដែរ។ ប្រទេសនេះបានឃ្លាំមើលសង្គ្រាមរបស់អ៊ីស្រាអែល ប្រឆាំងនឹងក្រុមប៉ាឡេស្ទីនហាម៉ាស ដែលជាសម្ព័ន្ធមិត្តរបស់អ៊ីរ៉ង់មួយផ្សេងទៀត ដោយមានការប្រកាសអាសន្នយ៉ាងខ្លាំងក្នុងប្រទេស។

ព្រះមហាក្សត្រហ្ស៊កដានី ព្រះនាម Abdullah បានមានបន្ទូលដោយត្រង់ៗអំពីការភ័យខ្លាចរបស់ព្រះអង្គ ដោយខ្លាចថាជម្លោះនេះអាចបង្កឱ្យមានការផ្លាស់ទីលំនៅថ្មីរបស់ជនជាតិប៉ាឡេស្ទីន ទៅកាន់ព្រះរាជាណាចក្រហ្ស៊កដានី ដែលជាជម្រកសម្រាប់ប្រជាជនប៉ាឡេស្ទីន ដ៏ច្រើន ដែលត្រូវបានបណ្តេញចេញពីទឹកដីរបស់ពួកគេ នៅពេលអ៊ីស្រាអែល ត្រូវបានបង្កើតឡើងក្នុងឆ្នាំ១៩៤៨ មក។

ប៉ុន្តែបណ្ដាអតីតមន្ត្រីជាន់ខ្ពស់របស់ហ្ស៊កដានី និងប្រភពសន្តិសុខបានប្រាប់សារព័ត៌មាន រ៉យទ័រ ថា ប្រទេសហ្ស៊កដានី ឥឡូវនេះ កំពុងអំពាវនាវឱ្យមានការការពារផ្នែករឹង និងការគាំទ្ររបស់សហរដ្ឋអាមេរិកកម្រិតខ្ពស់បន្ថែមទៀត ដោយសារតែការព្រួយបារម្ភពីអ៊ីរ៉ង់ និងកងកម្លាំងតំណាងរបស់ប្រទេសនេះ អាចក្លាយជាការជ្រួលច្របល់កាន់តែខ្លាំងនៅក្នុងការប៉ះទង្គិចនៅមជ្ឈិមបូព៌ា៕