មីយ៉ាន់ម៉ា ៖ ក្រសួងរតនាគារសហរដ្ឋអាមេរិក បានដាក់ទណ្ឌកម្មលើក្រុមហ៊ុនប្រេង និងឧស្ម័ន ដែលគ្រប់គ្រងដោយរដ្ឋរបស់សហភាពមីយ៉ាន់ម៉ា ដោយសារក្រុមហ៊ុននេះ នៅតែជាប្រភពចំណូលបរទេសដ៏សំខាន់បំផុតតែមួយគត់ សម្រាប់របបយោធារបស់ប្រទេសនេះ។

ក្រសួងបានចេញផ្សាយសេចក្តីបង្គាប់បញ្ជាដែលហាមប្រាមសេវាកម្មហិរញ្ញវត្ថុមួយចំនួន ដោយក្នុងនោះរួមទាំងការវិនិយោគ និងការផ្ដល់ប្រាក់កម្ចីទៅកាន់ក្រុមហ៊ុន ពីសំណាក់ស្ថាប័ននៅសហរដ្ឋអាមេរិក។ វិធានការ ដែលបានប្រកាស កាលពីថ្ងៃអង្គារ (ទី៣១ ខែតុលា) ចោទប្រកាន់ថា ក្រុមហ៊ុននោះ បានផ្តល់ជំនួយដល់ពួកយោធារាប់រយលានដុល្លារ ក្នុងមួយឆ្នាំៗ ចាប់តាំងពីរបបនេះ បានឡើងកាន់កាប់អំណាច ក្នុងឆ្នាំ២០២១។

ហើយក្រសួងបានបញ្ជាក់ថា វិធានការនេះ មានគោលបំណងបំផ្លាញសមត្ថភាពរបស់ពួកយោធា ក្នុងការទិញអាវុធពីបរទេស ហើយយកអាវុធទាំងនោះ ទៅប្រព្រឹត្តអំពើឃោរឃៅលើប្រជាជនមីយ៉ាន់ម៉ា។

ចំណែកលោករដ្ឋមន្ត្រីការបរទេសអាមេរិក លោក Antony Blinken បានឲ្យដឹងនៅក្នុងសេចក្តីថ្លែងការណ៍ថា ការចាត់តាំងនេះ ជួយពង្រឹងកិច្ចខិតខំប្រឹងប្រែងរបស់សហរដ្ឋអាមេរិក ដើម្បីទប់ស្កាត់អំពើឃោឃៅរបស់របបយោធានៃប្រទេសនេះ៕