ទីភ្នាក់ងារស៊ើបការណ៍ចារកម្មសម្ងាត់ របស់ប្រទេសកូរ៉េខាងត្បូង បាននិយាយនៅក្នុងសន្និសីទសារព័ត៌មានមួយកាលពីថ្ងៃពុធ (១ វិច្ឆិកា) ថា ប្រទេសកូរ៉េខាងជើង កំពុងស្ថិតក្នុងដំណាក់កាលចុងក្រោយនៃការរៀបចំសម្រាប់ការបាញ់បង្ហោះផ្កាយរណបចារកម្មរបស់ខ្លួន ហើយឱកាសនៃការប៉ុនប៉ងលើកទីបី មួយនេះ អាចទទួលបានជោគជ័យខ្ពស់ ដោយមានការជួយពីប្រទេសរុស្ស៊ី។

សមាជិកនៃគណៈកម្មាការសភារបស់កូរ៉េខាងត្បូង លោក យ៉ូ សាងប៊ុម (Yoo Sang-bum) បាននិយាយដោយដកស្រង់របាយការណ៍របស់ទីភ្នាក់ងារចារកម្មជាតិ (NIS) ថា កូរ៉េខាងជើង ហាក់ដូចជាបានទទួលជំនួយបច្ចេកទេសពីរុស្ស៊ី ហើយទំនងជាកំពុងពិនិត្យមើលម៉ាស៊ីន និងយន្តការបាញ់បង្ហោះរបស់យាននេះ ប៉ុន្តែរបាយការណ៍នោះមិនបានផ្តល់ព័ត៌មានលម្អិតបន្ថែមទៀតទេ ដោយសារតែហេតុផលសន្តិសុខ។

កូរ៉េខាងជើង ធ្លាប់បានសន្យាថា ខ្លួននឹងធ្វើការបាញ់បង្ហោះផ្កាយរណបចារកម្មលើកទីបី នៅក្នុងខែតុលា ប៉ុន្តែរហូតមកដល់ពេលនេះ មិនទាន់មានការបង្ហាញណាមួយថា ខ្លួនហៀបនឹងបន្តដំណើរការបាញ់បង្ហោះនោះទេ។

មេដឹកនាំកូរ៉េខាងជើង លោក គីម ជុងអ៊ុន បានជួបប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីខែកញ្ញា នៅតំបន់ចុងបូព៌ារបស់រុស្ស៊ី ជាទីដែលលោកបានទៅទស្សកិច្ចស្ថានីយបាញ់បង្ហោះយានអវកាសទំនើបរបស់រុស្ស៊ី ដោយជំរុញឱ្យមានការរំពឹងទុកថា ទីក្រុងមូស្គូ នឹងជួយដល់កម្មវិធីអវកាសរបស់កូរ៉េខាងជើង ជាថ្នូរនឹងការផ្គត់ផ្គង់អាវុធធម្មតាពីប្រទេសផ្ដាច់ខ្លួនមួយនេះដល់រុស្ស៊ី ផងដែរ៕