ភ្នំពេញ ៖ ក្នុងឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកនាពេលខាងមុខនេះ មនី្ទរវប្បធម៌ និងវិចិត្រសិល្បៈ រាជធានីភ្នំពេញ បានត្រៀមរៀបចំកម្មវិធីសម្តែងសិល្បៈ ការប្រគំតន្រី្តសម័យ និងពិធីសាសនា ផ្សេងៗ រយៈពេល៣ថ្ងៃ ចាប់ពីថ្ងៃទី២៦-២៧-២៨ ខែវិច្ឆិកា ឆ្នាំ២០២៣ខាងមុខ នៅរមណីយដ្ឋានវប្បធម៌ ប្រវតិ្តសាស្រ្តវត្តភ្នំ។

​លោក ជុំ វុឌ្ឍី ប្រធានមនី្ទរវប្បធម៌ និងវិចិត្រសិល្បៈ រាជធានីភ្នំពេញ ថ្លែងប្រាប់BTV ព័ត៌មាន នាព្រឹកថ្ងៃទី២ ខែវិចិ្ឆកា ឆ្នាំ២០២៣នេះថា មនី្ទរវប្បធម៌ និងវិចិត្រសិល្បៈ រាជធានីភ្នំពេញ មានទីតាំងនៅរមណីយដ្ឋានវប្បធម៌ ប្រវតិ្តសាស្រ្តវត្តភ្នំ ដើម្បីត្រៀមរៀបចំសកម្មភាពសប្បាយរីករាយជូនបងប្អូនប្រជាពលរដ្ឋទូទៅ សម្រាប់ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក។ ដូច្នេះកម្មវិធីដែលមនី្ទរវប្បធម៌រាជធានី អាចប្រព្រឹត្តទៅបាន អាស្រ័យទៅលើឯកឧត្តម អភិបាលរាជធានីភ្នំពេញ បានផ្តល់ឱកាសគ្រប់យ៉ាង ដើម្បីឲ្យមនី្ទរវប្បធម៌រៀបចំ។

​លោក ប្រធានមនី្ទរវប្បធម៌ និងវិចិត្រសិល្បៈ រាជធានីភ្នំពេញ បានបញ្ជាក់ជូនថា មនី្ទរវប្បធម៌រាជធានីភ្នំពេញ ជាសេនាធិការឲ្យរដ្ឋបាលរាជធានីភ្នំពេញ និងក្រសួងវប្បធម៌ និងវិចិត្រសិល្បៈ ទន្ទឹមនឹងនោះ ការចូលរួមថែរក្សាការពារ អភិរក្សវប្បធម៌ប្រវតិ្តសាស្រ្ត កេរ្តិ៍ដំណែលដូនតាដែលបានបន្សល់ទុក គឺសំខាន់ខ្លាំងណាស់។ ក្រៅអំពីក្រសួងវប្បធម៌ និងវិចិត្រសិល្បៈ គឺមានមនី្ទរវប្បធម៌រាជធានី ដែលជាសេនាធិការធ្វើការផ្ទាល់ជាមួយក្រសួងវប្បធម៌ និងវិចិត្រសិល្បៈ និងធ្វើការផ្ទាល់ជាមួយរដ្ឋបាលរាជធានីភ្នំពេញ ហើយកិច្ចការទាំងអស់នេះ គឺសម្គាល់នូវអត្តសញ្ញាណបាន គឺតាមរយៈសិល្បៈ សម្រាប់បង្ហាញនូវទម្រង់សិល្បៈនានា។ លោក ជុំ វុឌ្ឍី ក៏បានអំពាវនាវដល់យុវជនជំនាន់ក្រោយ ដែលជាសសរទ្រូងនៃប្រទេសជាតិយើង រួមមាន៖វប្បធម៌ ប្រពៃណី ទំនៀមទំលាប់ និងសាសនា គឺសំខាន់ បើយើងរស់នៅគ្មានអត្តសញ្ញាណទេ គឺមិនដឹងយើង ជាជនជាតិអ្វីនោះទេ។ ដូច្នេះអត្តសញ្ញាណ គឺសំខាន់ខ្លាំងណាស់ ហេតុនេះ អ្វី ដែលបុព្វបុរសបានបន្សល់ទុក គឺសូមឲ្យយុវជនជំនាន់ក្រោយ ចូលរួមឲ្យបានខ្លាំងក្លា និងរក្សាឲ្យបាននូវអត្តសញ្ញាណរបស់យើង៕  អត្ថបទ៖ រដ្ឋា