អាមេរិក៖ លោក Joe Biden កំពុងរៀបចំការចាប់ផ្តើមដំណើរទស្សនកិច្ច នៅក្រៅប្រទេសលើកដំបូងរបស់លោកក្នុងសប្ដាហ៍នេះជាប្រធានាធិបតី ក្នុងគោលបំណងបង្ហាញការប្តេជ្ញាចិត្តរបស់រដ្ឋបាលលោក ទៅកាន់សម្ព័ន្ធភាពឆ្លងកាត់សមុទ្រអាត្លង់ទិក និងចូលរួមជាថ្មីជាមួយសម្ព័ន្ធមិត្តសំខាន់ៗ។
លោក Biden នឹងចូលរួមកកិច្ចប្រជុំកំពូលនៃក្រុមប្រទេស G7 នៅទីក្រុង Cornwall ប្រទេសអង់គ្លេសដែលកំណត់ពេលនៅថ្ងៃទី១១ ដល់ថ្ងៃទី១៣ ខែមិថុនាខាងមុខនេះ បន្ទាប់មកនឹងធ្វើដំណើរទៅកាន់ទីក្រុងព្រូស៊ែល ប្រទេសប៊ែលហ្សិក ជាកន្លែងដែលលោកនឹងមានជំនួបជាមួយមេដឹកនាំសហភាពអឺរ៉ុប និងចូលរួមកិច្ចប្រជុំកំពូលមេដឹកនាំ អង្គការសន្ធិសញ្ញាអាត្លង់ទិកខាងជើង (NATO) នៅថ្ងៃទី១៤ ខែមិថុនា។ ទីប្រឹក្សាសន្តិសុខជាតិសហរដ្ឋអាមេរិក លោក Jake Sullivan និយាយថា ការប្រយុទ្ធប្រឆាំងមេរោគរាតត្បាតកូរ៉ូណា ផែនការហេដ្ឋារចនាសម្ព័ន្ធសកល និងផែនការសម្រាប់ពន្ធជាអប្បបរមា នឹងត្រូវបានថ្លែងនៅកិច្ចប្រជុំកំពូលG7។
នៅក្នុងប្រទេសអង់គ្លេស លោក Biden និងមានជំនួបទ្វេភាគីជាមួយនាយករដ្ឋមន្ត្រីអង់គ្លេស លោក Boris Johnson និងមេដឹកនាំមួយចំនួនទៀត ហើយលោកនឹងមានកិច្ចប្រជុំមួយបន្ថែមទៀតក្នុងទីក្រុងព្រូស៊ែលជាមួយសម្ព័ន្ធមិត្តណាតូ រួមទាំងប្រធានាធិបតីទួរគី លោក Recep Tayyip Erdogan។ ប្រធានាធិបតីសហរដ្ឋអាមេរិក ភាគច្រើនបានជ្រើសរើសយកអាមេរិកខាងជើងដែលនៅជិតខាង សម្រាប់ដំណើរទស្សនកិច្ចឆ្លងកាត់ព្រំដែនលើកដំបូង៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
