ភ្នំពេញ ៖ ឯកឧត្តម ហង់ ជួនណារ៉ុន ឧបនាយករដ្ឋមន្ត្រី និងជារដ្ឋមន្រ្តីក្រសួងអប់រំ យុវជន និងកីឡា លើកឡើងថា ការប្រឡងបាក់ឌុប នៅថ្ងៃទី ៦ ខែវិច្ឆិកា ឆ្នាំ ២០២៣នេះ ជាដំណាក់កាលថ្មី សម្រាប់រាជរដ្ឋាភិបាលនីតិកាលទី៧។ ឯកឧត្តម បានបញ្ជាក់ឱ្យគ្រប់ភាគីពាក់ព័ន្ធមានសមត្ថកិច្ចក្នុងការរៀបចំការប្រឡងនេះ ត្រូវអនុវត្តនិងធ្វើឱ្យការប្រឡងឆ្នាំនេះ កាន់តែល្អជាងឆ្នាំកន្លង។ នេះជាការលើកឡើងក្នុង ការជួបប្រជុំណែនាំបច្ចេកទេស ជាមួយគណៈមេប្រយោគសម្រាប់ការប្រឡងទូទាំងប្រទេស។

​ឯកឧត្តម ហង់ ជួនណារ៉ុន ឧបនាយករដ្ឋមន្រ្តី រដ្ឋមន្ត្រីក្រសួងអប់រំ យុវជន និងកីឡា រួមទាំងវត្តមាន ឯកឧត្តម ទេសរដ្ឋមន្រ្តី ឱម យិនទៀង ប្រធានអង្គភាពប្រឆាំងអំពើពុករលួយ បានចូលរួមជាអធិបតីក្នុងកិច្ចប្រជុំណែនាំបច្ចេកទេស ជាមួយគណៈមេប្រយោគសម្រាប់ការប្រឡងទូទាំងប្រទេស។ ឯកឧត្តមរដ្ឋមន្ត្រីក្រសួងអប់រំ បានណែនាំទៅគណៈមេប្រយោគទូទាំងប្រទេស ត្រូវតែពង្រឹងយន្តការនីតិវិធីទប់ស្កាត់គ្រប់គ្រងភាពមិនប្រក្រតី នៅគ្រប់ដំណាក់កាលទាំងអស់ ពិសេសក្នុងដំណាក់កាលសំណេរ។ ឯកឧត្តមបញ្ជាក់ឱ្យមានការធ្វើការជិតស្និទ្ធ ជាមួយអង្គភាពប្រឆាំងអំពើពុករលួយ អាជ្ញាធររាជធានី-ខេត្ត អ្នកសង្កេតការណ៍ ក៏ដូចជាសហភាពសហព័ន្ធយុវជនកម្ពុជា។ ឯកឧត្តមលើកឡើងពីបញ្ហាធ្លាប់កើតឡើងកន្លងមក ក្នុងនោះរួមមាន ការបិទឈ្មោះ និងបញ្ហាដែលបេក្ខជនរកឈ្មោះមិនឃើញ និងបញ្ហាប្រើប្រាស់ទូរស័ព្ទដៃ ក៏ដូចជាឧបករណ៍អេឡិចត្រូនិកទាំងបេក្ខជន និងមន្រ្តីអប់រំ ដែលនៅមានភាពខ្វះចន្លោះ និងការថតបង្ហោះវិញ្ញាសារ ដែលត្រូវពង្រឹងជាចាំបាច់ ព្រោះបញ្ហាទាំងនេះ តែងកើតឡើងជារៀងរាល់ឆ្នាំ។

ក្រោយបញ្ចប់កិច្ចប្រជុំនេះ ប្រធានមណ្ឌល ក៏ដូចជាប្រធានអប្បមាទ ដែលមានវត្តមានក្នុងកិច្ចប្រជុំ បានលើកឡើងជាការប្ដេជ្ញាថា ពួកគាត់នឹងបំពេញតួនាទីរបស់ខ្លួន ឱ្យល្អបំផុត។ គោលដៅគឺ ភាពរួមមួយដើម្បីសម្រាំងធនធានមនុស្សចេញពីការប្រឡង ចេះគឺជាប់ ផ្ដល់នូវយុត្តិធម៌ សម្រាប់សិស្សគ្រប់រូប។

ក្នុងកិច្ចប្រជុំនេះ ឯកឧត្តម ទេសរដ្ឋមន្រ្តី ឱម យិនទៀង ប្រធានអង្គភាពប្រឆាំងអំពើពុករលួយ ដែលបានបញ្ជូនក្រុមការងារចូលរួមការងារ ក្នុងការប្រឡងបាក់ឌុបជាច្រើនឆ្នាំមកនេះ ក៏បានកោតសសើរចំពោះ ជោគជ័យរបស់ក្រសួងអប់រំ ក្នុងការធ្វើកំណែទម្រង់ការប្រឡងនេះដែរ។ ក្នុងឆ្នាំ២០២៣នេះ អង្គភាពប្រឆាំងអំពើពុករលួយ ក៏ចូលរួមដាក់មន្ត្រី និងអ្នកសង្កេតការណ៍ស្ម័គ្រចិត្តជាង៣ពាន់នាក់ចូលរួមក្នុងការសង្កេតការណ៍ ការប្រឡងសញ្ញាបត្រមធ្យមសិក្សាទុតិយភូមិនៅឆ្នាំនេះផងដែរ។ 

សូមបញ្ជាក់ថា ការប្រឡងសញ្ញាបត្រមធ្យមសិក្សា ទុតិយភូមិ នឹងប្រព្រឹត្តិទៅរយៈពេល ២ថ្ងៃ គឺថ្ងៃទី ៦ និងថ្ងៃទី ៧ខែ វិច្ឆិកា ឆ្នាំ ២០២៣៕

អត្ថបទ៖ គឹមហុក​